Germaniya Tashqi ishlar vazirligi (TIV) Germaniyaga uzoq muddatli milliy viza olish uchun yangi onlayn ariza xizmati 2025 yilning birinchi choragida qator mamlakatlarda, jumladan, Rossiya, Ukraina, Qozog‘iston va Gurjistonda ham ochilishini bildirdi.
1 yanvar, chorshanba kuni Germaniya Tashqi ishlar vazirligi butun dunyo bo‘ylab Germaniyaga ishlash, o‘qish yoki oila birlashishi uchun viza olish maqsadida arizalar elektron formatga o‘tkazilganini ma’lum qildi. Shu maqsadda boshqarma tomonidan maxsus onlayn portal ishga tushirildi. Biroq, DW muxbiriga ko‘ra, ba’zi mamlakatlarni tanlashda «onlayn ariza mavjud emas» degan xabar paydo bo‘lgan. Bu, masalan, Rossiya, Ukraina, Qozog‘iston, Gurjiston va Tojikistonga tegishli.
Buning sabablaridan biri — uzun navbatlar
Germaniya Tashqi ishlar vazirligi 2 yanvar, payshanba kuni DW nashriga xorijdagi barcha 167 nemis viza muassasalari yangi onlayn portalga ulanganini ma’lum qildi. Biroq, ularning «texnik aloqasi yangi onlayn format uchun ish jarayonlarini qayta o‘zgartirish bilan birga keladi». «Ro‘yxatdan o‘tganlarga, albatta, ariza berishga yozilishda ustuvorlik beriladi», deya ma’lum qildi TIV.
«Ko‘pchilik viza muassasalarida kutish ro‘yxatlarining bekor qilinishi yangi onlayn formatning ishga tushirilishi bilan bir vaqtda amalga oshirildi, ayrim viza muassasalari hozirda xalqaro onlayn portal orqali ariza topshirishga ruxsat berishdan oldin kutish ro‘yxatlarini bekor qilishga ustuvor ahamiyat qaratmoqda», — deyiladi ma’lumotda.
Germaniya vizasi uchun arizalar elektron formatga o‘tkazildi
Germaniya Tashqi ishlar vazirligi uzoq muddatli nemis milliy vizalarini olish uchun arizalarni elektron onlayn ko‘rib chiqish portalini ishga tushirdi. Bu haqda 1 yanvar kuni boshqarma saytida ma’lum qilindi.
Press-relizda ta’kidlanganidek, ushbu loyiha ikki yil avval test formatida ishga tushirilgan. «Bu endi dunyo bo‘ylab 167 ta viza idoralarida raqamli haqiqatga aylanmoqda. Milliy viza 28 toifada raqamli shaklda qo‘llanishi mumkin», deyiladi xabarda.
Tashqi ishlar vaziri Annalena Berbokning aytishicha, innovatsiyadan asosiy maqsad Germaniyaga butun dunyodan malakali mutaxassislarni jalb etishdir. «Bunday paytlarda biz uzoq vaqt me’yoriy hujjatlarni rasmiylashtirish va undan ham uzoqroq kutish tufayli eng yaxshi odamlarning mamlakatimizda ishlashiga to‘sqinlik qila olmaymiz», dedi vazir.
«Oxirgi 2,5 yil ichida biz mavjud viza jarayonini keng ko‘lamli, uzoq vaqtdan beri kechiktirilgan tarkibiy islohot bilan o‘zgartirdik. Va endi biz nihoyat Yevropaning eng zamonaviy immigratsiya qonunini raqamli asrga olib chiqmoqdamiz. Elektron viza jarayoni - haqiqiy ma’muriy inqilob, bu Germaniyani biznes qilish joyi sifatida mustahkamlaydi, buni biznes va yirik korporatsiyalar uzoq vaqtdan beri talab qilmoqda», - dedi Berbok.
Onlayn ariza berish imkoni Belarus, Armaniston, Ozarboyjon, Moldova, Litva, Latviya, Estoniya, O‘zbekiston, Qirg‘iziston, Turkmaniston, shuningdek, Isroil va AQShda mavjud.
