BAAning Ras-al Xayma shahrida yangi yil shousi doirasida dronlar yordamida namoyish etilgan tomoshalarda ikkita Ginnes rekordi o‘rnatildi. Bu haqda amirlikning Turizmni rivojlantirish departamenti (RAKTDA) xabar berdi.
«Bu yilgi Yangi yil bayrami Ras al-Xaymaning 2024 yilda sayyohlik sohasidagi ajoyib yutuqlarining yorqin aksi bo‘ldi. Bayram shousi doirasida o‘rnatilgan ikkita Ginnes rekordi amirlikning innovatsion ruhi va madaniy o‘ziga xosligini namoyon etdi», — deydi RAKTDA rahbari Raki Fillips.
Rekordlar «Havoda dronlar yordamida eng katta daraxt shakli hosil qilingani» hamda «Havoda dronlar tomonidan hosil qilingan dengiz chig‘anog‘ining eng katta shakli» hisobiga o‘rnatilgan.
Our Story in the Sky shousi amirlik tarixi va madaniyatiga bag‘ishlangan. Sohil bo‘ylab to‘rt kilometrga cho‘zilgan maydonda 1,4 mingta dron, lazer va pirotexnika vositalari yordamida uch soatlik tomosha namoyish etilgan. Tomoshaning birinchi qismida amirlik ekotizimi, ikkinchisida dengiz merosi va marvarid olish jarayoni, uchinchisida esa dengizchilik tarixi haqida ma’lumot berilgan. Tomosha mushakbozlik bilan yakunlangan.
Ras-al Xaymada o‘tgan yili uyushtirilgan mushakbozlik ham ikkita nominatsiya bo‘yicha Ginnesning rekordlar kitobiga kiritilgan edi: suv va havodagi eng uzun mushakbozlik chizig‘i uchun.
