Germaniya federal hukumati Suriyaga yordam beradigan bir qancha loyihalarda ishtirok etadi. Bu maqsadlar uchun jami 60 million yevro ajratiladi. Biroq pullar Suriya rasmiylariga to‘g‘ridan to‘g‘ri yuborilmaydi, dedi Germaniyaning iqtisodiy hamkorlik va rivojlanish vaziri Svenya Shulse 30 dekabr, dushanba kuni chop etilgan Redaktionsnetzwerk Deutschland (RND) nashriga bergan intervyusida.
Shulsening so‘zlariga ko‘ra, Suriyada Bashar Asad rejimi qulagandan keyin gumanitar vaziyat «halokatli» – mamlakat aholisining 90 foizi qashshoqlikda yashaydi va insonparvarlik yordamiga bog‘liq. 2011 yildan beri davom etgan fuqarolar urushi paytida mahalliy infratuzilmaning katta qismi vayron qilingan.
Berlin ishtirok etadigan Suriyani qayta tiklash loyihalari nodavlat va xalqaro tashkilotlar orqali amalga oshiriladi. Xususan, 25 million yevro Birlashgan Millatlar Tashkilotining Bolalar jamg‘armasiga (YuNISEF) yo‘naltirilishi kerak, u boshqa ishlar qatorida maktablarni ta’mirlash bilan shug‘ullanadi. Bundan tashqari, mablag‘ urushdan jabr ko‘rgan bolalarga yordam berish uchun sarflanadi. Mahalliy maktablarni tashkil etishni qo‘llab-quvvatlash uchun esa 6 million yevro ajratiladi.
Yana 19 million yevro Birlashgan Millatlar Tashkilotining Taraqqiyot dasturi (UNDP)ga yo‘naltiriladi, u boshqa narsalar qatori ichki ko‘chirilganlar uchun ishlarni tashkil qiladi. Suriyalik ayollar huquqlarini himoya qiluvchi tashkilotlarni qo‘llab-quvvatlovchi BMT jamg‘armasi 3 million yevro oladi, qolgan yetti million esa «turli aholi guruhlari o‘rtasida yarashuv» bilan shug‘ullanuvchi mahalliy nodavlat tashkilotlarga ajratiladi.
Shulsening qayd etishicha, ayni damda Berlin mamlakatdagi hokimiyatning «Hay’at Tahrir ash-Shom» (Hsh) guruhiga o‘tishi fonida Suriyada nima bo‘lishini oldindan aytolmaydi. «Ammo ijobiy rivojlanish uchun imkoniyat mavjud va endi biz uni qo‘llab-quvvatlash uchun hamma narsani qilishimiz kerak», dedi nemis vaziri.
«Biz umidlarimizni aniq belgilab oldik: mafkuradan, diskriminatsiyadan va chetlanishdan xoli ta’lim tizimi, agar taraqqiyot to‘g‘ri yo‘nalishda ketsa, biz boshqa sohalarda ham ko‘p ishlarni qilishga tayyormiz», dedi Shulse.
Sobiq isyonchi guruhlar Suriya Mudofaa vazirligini nazorat qilmoqchi
24 dekabr kuni Suriyaning amaldagi rahbari, «Hay’at Tahrir ash-Shom» (Hsh) radikal guruhi yetakchisi, Abu Muhammad al-Juloniy nomi bilan tanilgan Ahmad al-Shara va isyonchi guruhlarning sobiq rahbarlari ularni tarqatib yuborish va keyinchalik mamlakat Mudofaa vazirligi rahbarligida birlashtirish to‘g‘risida kelishib oldi. Bu haqda Reuters agentligi iqtibos keltirgan Suriyaning yangi hukumati bayonotida aytiladi.
O‘tgan hafta Suriya bosh vaziri Muhammad al-Bashir Mudofaa vazirligi qayta tashkil etilishini va bu jarayonga sobiq isyonchi guruhlar, shuningdek, Bashar Asad armiyasidan qochib ketgan zobitlar jalb etilishini aytdi, deya aniqlik kiritadi agentlik. Endi Ahmad al-Shara oldida ko‘plab qurollangan sobiq isyonchilar guruhlari o‘rtasidagi to‘qnashuvlarning oldini olish vazifasi turibdi, deya ta’kidlaydi Reuters.
