Prezident Shavkat Mirziyoyev Ozarboyjon prezidenti Ilhom Aliyevga va Rossiya prezidenti Vladimir Putinga Qozog‘istonning Oqtov shahri yaqinida «Ozarboyjon havo yo‘llari»ning yo‘lovchi samolyoti halokatga uchragani oqibatida ko‘plab odamlar qurbon bo‘lgani yuzasidan hamdardlik bildirdi.

Davlat rahbari jarohat olganlarning barchasi tez fursatda sog‘ayib ketishlarini tiladi.

25 dekabr kuni «Ozarboyjon havo yo‘llari»ning Bokudan Grozniy tomon uchgan yo‘lovchi samolyoti Qozog‘istonning Oqtov shahri aeroportiga majburiy qo‘nishni amalga oshirishga urinib, halokatga uchradi.

Samolyot bortida 64 yo‘lovchi va ekipajning 5 nafar a’zosi bo‘lgan. So‘nggi ma’lumotlarga ko‘ra, 32 kishi halokatdan omon qolgan, ularning kamida to‘qqiz nafari og‘ir ahvolda jonlantirish bo‘limiga yotqizilgan. Samolyot bortidagilarning 37 nafari Ozarboyjon, 16 nafari Rossiya, olti nafari Qozog‘iston, uch nafari Qirg‘iziston fuqarolari bo‘lgan.

Qozog‘iston hukumati aviahalokat sabablarini o‘rganish bo‘yicha hukumat komissiyasi tuzdi. Havo kemasidan foydalanish paytida xavfsizlik qoidalari buzilishi moddasi bo‘yicha jinoiy ish qo‘zg‘atildi.