Vladimir Putin va Aleksandr Lukashenko Ittifoq davlati Oliy davlat kengashi majlisi doirasida Rossiya hamda Belarus o‘rtasida xavfsizlik kafolatlari to‘g‘risidagi shartnomani imzoladi.

Hujjatni imzolashdan oldin Putin ushbu kelishuv mudofaa, Rossiya va Belarus suvereniteti, mustaqilligi va konstitutsiyaviy tuzumini himoya qilish, Ittifoq davlati hududi va tashqi chegarasi yaxlitligi hamda daxlsizligini ta’minlash bo‘yicha o‘zaro majburiyatlarni belgilab berishini aytdi.

Putinning so‘zlariga ko‘ra, bu muammolarni hal qilish uchun «mavjud barcha kuch va vositalar» jalb etilishi mumkin. «Gap xususan, Belarus prezidentining taklifiga ko‘ra respublika hududiga joylashtirilgan Rossiyaning taktik yadroviy quroli haqida ham ketmoqda», — deya qo‘shimcha qiladi u.

Lukashenko, shuningdek, shartnoma har ikki davlat fuqarolari uchun ham tinch hayot kafolatini shakllantirish imkonini berishini ta’kidladi.

Shartnomani imzolash marosimi Minskda tashkil etilgan Ittifoq davlati Oliy davlat kengashi majlisidan keyin o‘tkazildi. Vladimir Putin 6 dekabr kuni Belarus poytaxtiga tashrif buyurgan. Majslis avvalida Belarus Xavfsizlik kengashi davlat kotibi Aleksandr Volfovich endi Aleksandr Lukashenkoda ham xuddi Vladimir Putindagi kabi «qizil tugma» borligini ma’lum qilgandi. 

Noyabr oyida Putin Rossiya yadroviy doktrinasini tasdiqlagan edi. Ko‘p o‘tmay AQSh prezidenti Jo Bayden Ukraina Qurolli kuchlariga Rossiya hududiga uzoq masofaga mo‘ljallangan ATACMS raketalari yordamida zarba yo‘llashga ruxsat berdi.

Yangilangan doktrinaga ko‘ra, «yadroviy davlat ko‘magida har qanday yadroviy bo‘lmagan davlat tomonidan Rossiya Federatsiyasi va uning ittifoqchilariga tajovuz qilish», shuningdek yadroviy bo‘lmagan vositalar, shu jumladan dronlar bilan ommaviy havo hujumi uyushtirish yadroviy zarba uchun asos bo‘ladi.