Tadbirda O‘zbekistonning Shanhaydagi Bosh konsulxonasi vakillari, Uzbekistan Airways AJning Pekindagi vakolatxonasi mas’ul xodimlari, ushbu provinsiya Xalq hukumati tashqi ishlar boshqarmasi, Xanchjou xalqaro aeroporti ma’muriyati rahbariyati va vatandoshlar ishtirok etdi.

Yangi reys haftada bir marta, har yakshanba kuni Toshkentdan soat 12:40 da uchadi va Xanchjouga soat 22:00 da yetib keladi. Xanchjoudan qaytish reysi soat 23:30 da uchadi  va soat 04:10 da Toshkentga qo‘nadi.

Partiya qo‘mitasi a’zosi, Xalq hukumati tashqi ishlar boshqarmasi direktori o‘rinbosari va Chjetszyan provinsiyasi xorijiy davlatlar bilan do‘stlik assotsiatsiyasi vitse-prezidenti Sin Xuydunning aytishicha, O‘zbekiston Chjetszyan provinsiyasi bilan savdo-iqtisodiy, transport-logistika va madaniy-gumanitar loyihalarni muvaffaqiyatli amalga oshirayotgan birinchi davlatlardan biri hisoblanadi. 

Xanchjou xalqaro aeroporti Sharqiy Xitoyda 2-o‘rinda, mamlakatdagi eng yaxshi 10 ta aeroportdan biri va dunyodagi eng yirik 100 ta aeroport qatorida qayd etiladi. Ushbu aeroport 2019 yilda dunyodagi eng gavjum aeroportlardan bir sifatida e’tirof etilgan. 2024 yil oxirida yo‘lovchi tashish hajmi 48 million kishidan oshishi kutilmoqda.