Moskva harbiy komissarliklari chaqiruv qog‘ozlari bo‘yicha kelmagan chaqiriluvchilarga ularga nisbatan cheklovlar joriy etilgani haqida SMS-xabarlar jo‘natishni boshladi. Bu haqda 12 noyabr, seshanba kuni «Vajnyye istorii» nashri Vijdonli e’tiroz bildiruvchilar harakati (VEH) huquqshunosi Artem Kligaga asoslanib yozdi.

Xususan, xabarnomalarda chaqiriluvchining Rossiyadan chiqib ketishi taqiqlangani aytiladi. «Harbiy xizmatga chaqiruvdan bo‘yin tovlaganlik uchun Rossiya Federatsiyasi qonunchiligi jinoiy javobgarlikni nazarda tutadi», deyiladi matnda.

Rossiyaning ayrim mintaqalarida elektron chaqiruv qog‘ozlari reyestri sinovdan o‘tkazilmoqda

Sentyabr oyi o‘rtalarida Rossiya ommaviy axborot vositalari Harbiy hisobga olish yagona reyestri – reyestrpovestok.rf sayti ishga tushirilgani haqida xabar berdi. Shu bilan birga, portal sinov rejimida faqat Rossiyaning uchta mintaqasida ishlayapti: Saxalin va Ryazan oblastlarida, shuningdek, Mari El Respublikasida. 2023 yil bahorida qabul qilingan qonunga ko‘ra, reyestrga qo‘yilgan chaqiruv qog‘ozi e’lon qilingan kundan boshlab 7 kun o‘tgach topshirilgan deb hisoblanadi.

Reyestrda harbiy hisobda bo‘lganlarning shaxsiy va pasport ma’lumotlari, SNILS, INN, fuqaroligi to‘g‘risidagi ma’lumotlar, shu jumladan chet el fuqaroligi, yashash manzili, ta’lim, mehnat faoliyati va sog‘lig‘i to‘g‘risidagi ma’lumotlar bo‘lishi kerak.

Oktyabr oyi o‘rtalarida «Idite lesom» inson huquqlari loyihasi Moskvada elektron chaqiruv qog‘ozlari yuborila boshlangani haqida xabar berdi. Biroq, huquq himoyachilariga ko‘ra, ular hali yuridik kuchga ega emas va shuning uchun ularga e’tibor bermaslik mumkin. Elektron chaqiruvlar reyestrining butun Rossiya bo‘ylab ishga tushirilishi hozirda 2025 yil yanvariga rejalashtirilgan.