Buyuk Britaniya Xitoyning Londonda yangi katta elchixona ochish rejasini qo‘llab-quvvatlashga tayyor. Faqat qurilish rejasiga biroz o‘zgartirish talab etiladi, deb yozmoqda Financial Times.

Qayd etilishicha, Buyuk Britaniya TIV va IIV rahbarlari Devid Lemmi hamda Ivett Kuper rejalashtirish masalalari bo‘yicha inspeksiyaga qo‘shma maktub yo‘llab, politsiya Xitoyning London tarixiy qismida elchixona qurish borasidagi so‘roviga bildirgan e’tirozini yaqinda qaytarib olganini ma’lum qilgan. Hukumat a’zolari Xitoyni mavjud qurilish rejasidagi ayrim elementlarni o‘zgartirishga va butun London bo‘ylab joylashgan boshqa yettita vakolatxonasi akkreditatsiyasidan voz kechishga chaqirgan.

Yangi elchixona ochish masalasi uzoq yillardan biri Pekin va London o‘rtasidagi diplomatik keskinlik manbai bo‘lib kelayotgna edi. 2018 yilda Xitoy hukumati Tauer yaqinida joylashgan qirollik zarbxonasining sobiq binosini 255 million funt sterlingga sotib olgandi. XXR Merilebondagi elchixonasini shu yerga ko‘chirmoqchi bo‘lgan.

London munitsipaliteti o‘shanda Xitoy vakillariga ruxsat bermagan edi. Voqea Buyuk Britaniyaning sobiq bosh vaziri Rishi Sunak «Britaniya-Xitoy munosabatlarining oltin davri» tugaganini e’lon qilgan bir vaqtga to‘g‘ri keldi. 2023 yil avgustda Xitoy Britaniya hukumatini o‘zining diplomatik majburiyatlarini bajarmaganlikda ayblagandi.