Toshkent shahrida isitish mavsumi 7 noyabrdan boshlanadi. Bu haqda Toshkent shahri hokimligi xabar qildi.
Hokimlik «ko‘plab murojaatlari va meteorologiya xizmati ma’lumotlariga muvofiq» Toshkent shahar hokimining qaroriga asosan 5 noyabr soat 00:00 dan boshlab issiqlik manbalaridan issiqlik muhitining aylanma harakati yo‘lga qo‘yilishini ma’lum qilgan.
Shunga muvofiq, 7 noyabrdan boshlab issiqlik energiyasi bilan bosqichma-bosqich ta’minlash ishlari boshlanadi.
«Turar-joyingizda yoki rahbarlik qilayotgan muassasangizda issiqlik ta’minoti yoqilishi jarayonida biror-bir muammo va nosozliklarni aniqlasangiz yoki issiqlik yetkazib beruvchi tashkilot, XUJMSh va BSK rahbarlari yoki mutasaddilari tomonidan belgilangan ishlarni to‘laqonli amalga oshirilmayotganligining guvohi bo‘lsangiz 1055 yoki 71 210-01-87, 71 210-01-41, 71 210-01-11, 71 210-01-63 raqamlariga murojaat qilishingizni so‘raymiz», — deyiladi hokimlik xabarida.
Bundan oldinroq Surxondaryo va Samarqand viloyatlarida 1 noyabrdan isitish mavsumi boshlangani ma’lum qilingandi.
