Qozondagi BRICS sammitida qatnashgan Birlashgan Millatlar Tashkiloti bosh kotibi Antoniu Guterrish Rossiyani Ukrainaga qarshi urush olib borayotganini tanqid qildi va Rossiya prezidenti Vladimir Putin bilan suhbatda Rossiyaning harakatlari BMT Nizomi va xalqaro huquqqa zid ekanini qayd etdi. Bu haqda Guterrishning Qozondagi sammitga safari yakunlari bo‘yicha BMT rasmiy saytida chop etilgan press-relizda ma’lum qilindi.
Matbuot xizmatiga ko‘ra, jahon tashkiloti bosh kotibi nutq so‘zlaganidan keyin Putin bilan shaxsiy suhbatda Rossiyaning Ukrainaga keng ko‘lamli bosqinini qoralagan. Nutqning o‘zi davomida BMT bosh kotibi Rossiya Federatsiyasi xalqaro huquqni buzayotgani haqida hech qanday tarzda gapirmadi. U Ukrainadagi urushni faqat jahon hamjamiyati uchun tilga olgan boshqa muammolar qatorida sanab o‘tdi.
BMT bosh kotibi Putin bilan suhbat chog‘ida, shuningdek, «Qora dengizda suzish erkinligini o‘rnatish Ukraina, Rossiya Federatsiyasi hamda dunyoning oziq-ovqat va energetika xavfsizligi uchun muhim ahamiyatga ega ekanligiga ishonchini bildirdi», deyiladi BMT xabarida. Guterrish «ushbu yo‘nalishdagi muzokaralarni davom ettirish»ga chaqirdi. Ular Rossiya Federatsiyasi 2023 yilning yozida «don bitimi» dan chiqqanidan beri rasmiy ravishda o‘tkazilmagan.
Bundan tashqari, Guterrish va Rossiya yetakchisi Yaqin Sharqdagi mojaroning kuchayishi, xususan, G‘azo sektori va Livanda o‘t ochishni to‘xtatishga erishishni muhokama qildi. Suhbat chog‘ida «taraqqiyot va xalqaro moliya tizimi» masalalari ham ko‘rib chiqildi, deya xabar beradi BMT matbuot xizmati.
YeI: Guterrish BRICS sammitida Ukrainadagi urushni qoralashi kerak
22 oktyabr kuni Qozonda ochilgan BRICS sammitining barcha ishtirokchilari ushbu platformadan foydalanib, Rossiya prezidenti Vladimir Putinni Ukrainadagi urushni zudlik bilan tugatishga chaqirishi kerak. Bu haqda 23 oktyabr kuni Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel matbuot kotibi Piter Stano ma’lum qilgandi.
Bu chaqiriq, ayniqsa, BMT bosh kotibi Antoniu Guterrishga tegishli, dedi Stano. Uning so‘zlariga ko‘ra, u Putindan «rus qo‘shinlarini Ukraina hududidan darhol va so‘zsiz olib chiqib ketishni» talab qilishi kerak.
Antoniu Guterrish 22 oktyabr kuni BRICS sammitida ishtirok etish uchun Qozonga keldi, deb xabar qildi Tatariston parlamenti matbuot xizmati. Uni aeroportda Tatariston Davlat kengashi raisi Farid Muxametshin va Qozon meri Ilsur Metshin kutib oldi.
