Ayni paytda NATO Janubiy Koreya razvedkasining Shimoliy Koreya qo‘shinlari Ukrainaga qarshi urushda Rossiya tomonida jang qilishlari haqidagi xabarlarini tasdiqlay olmaydi. Bu haqda alyans bosh kotibi Mark Ryutte 18 oktyabr, juma kuni Bryusseldagi matbuot anjumanida jurnalistlar savoliga javoban aytib o‘tdi.

Uning aniqlik kiritishicha, bu ayni paytda NATOning rasmiy pozitsiyasi, ammo u o‘zgarishi mumkin. Alyans barcha ma’lumotlarni olish uchun Janubiy Koreya bilan aloqada, deya qo‘shimcha qildi Ryutte.

«Har qanday holatda ham, Shimoliy Koreya jismonan jang maydonida bo‘lmasa-da, u Eron va Xitoy kabi Rossiyaning Ukrainaga qarshi urushni kuchaytirishga yordam beryapti», dedi Shimoliy Atlantika alyansi rahbari.

Zelenskiy KXDRni urushda Rossiya tomonida qatnashishda aybladi

Ukraina prezidenti Volodimir Zelenskiy 16 oktyabr kuni Oliy radadagi nutqida «g‘alaba rejasi» taqdimoti oldidan Shimoliy Koreya qo‘shinlarining Ukrainaga qarshi agressiv urushda Rossiya tomonida bevosita ishtirok etgani haqidagi tasdiqlangan faktlarni ma’lum qildi. «RF rahbariyati boshchiligidagi «hujumchilar koalitsiyasi» hozirda 20 million koreysni garovda ushlab turgan Kim oilasi boshchiligidagi Shimoliy Koreyani o‘z ichiga oladi, bizning razvedka xizmatlarimiz nafaqat KXDRdan Rossiyaga qurol-yarog‘, balki odamlar ham o‘tkazilganini qayd etyapti», — deydi Zelenskiy.

Ukraina prezidentining aniqlik kiritishicha, gap «urushda halok bo‘lgan Rossiya fuqarolari o‘rniga Rossiya zavodlarining ishchilari» va «Rossiya armiyasi xodimlari» haqida bormoqda. «Va bu fakt. Aslida, bu ikkinchi davlatning Ukrainaga qarshi urushda Rossiya tomonida ishtirok etishi», — deya ta’kidladi Zelenskiy. U shuningdek, Eron rejimining RFga to‘g‘ridan to‘g‘ri yordami haqida gapirdi. Ukraina prezidenti Rossiya Federatsiyasi va Xitoy o‘rtasidagi hamkorlik ham davom etayotganini aytdi. «Bayonotlardan farqli o‘laroq, Pekin RF rahbariyatini, uning tajovuzkorligini va BMT Nizomi buzilishini to‘xtatish uchun haqiqiy qadamlar qo‘yishdan tiyilmoqda», — dedi Zelenskiy.