Smolensk yaqinida avgust oyida hibsga olingan rejissyor va yozuvchi Andrey Nekrasov ozodlikka chiqdi va Rossiyani tark etdi. Bu haqda 16 oktyabr, chorshanba kuni uning Facebookʼdagi sahifasida e’lon qilingan xabarda aytiladi.

Xabarda aytilishicha, bir kun oldin, 15 oktyabr kuni sud ijrochilari Nekrasovni Moskvaga olib kelishgan, shundan so‘ng u Rossiyani tark etgan va hozir «uchinchi davlatda». «Hayot va sog‘liq uchun hech qanday xavf yo‘q», deb ta’kidlaydi xabar mualliflari.

Avgust oyida faqat Germaniya fuqaroligiga ega bo‘lgan 66 yoshli Andrey Nekrasov Smolensk oblastida yangi filmni suratga olish vaqtida ushlangan edi. Uning so‘zlariga ko‘ra, fuqarolik kiyimidagi «FSB» xodimlari u «FSB» binosi yonida suratga olish ishlarini tashkil etganini da’vo qilgan. 

Sud rejissyorni «noqonuniy professional faoliyatda» aybdor deb topib, 90 kunga hibsga oldi. Rossiyada noqonuniy mehnat faoliyati bo‘yicha Ma’muriy javobgarlik to‘g‘risidagi kodeksning 18.10-moddasi jarima va mamlakatdan majburiy deportatsiya qilish jazosini nazarda tutadi.