Istiqbolli loyihalar milliy agentligi direktorining «Aksiyadorlik jamiyatlari xodimlarining aksiyalarga egalik qilish rejasini joriy etish tartibi to‘g‘risidagi nizomni tasdiqlash haqida»gi buyrug‘i qabul qilindi.
Hujjat bilan Aksiyadorlik jamiyatlari xodimlarining aksiyalarga egalik qilish rejasini joriy etish tartibi to‘g‘risidagi nizom tasdiqlanmoqda.
Aksiyalari birlamchi ommaviy taklif qilish orqali sotilishi belgilangan davlat ulushi 50 foiz va undan ortiq bo‘lgan jamiyatlarda egalik qilish rejasi joriy etilishi shart. Boshqa AJlar egalik qilish rejasini o‘z ixtiyoriga ko‘ra joriy etishi mumkin. Bunda ular Nizom talablariga rioya etishlari kerak.
Egalik qilish rejasini joriy etish jamiyat aksiyadorlarining umumiy yig‘ilishi vakolatiga kiradi.
Egalik qilish rejasi doirasida xodimlarni jamiyat aksiyalarini sotib olishga yoki aksiyalarga doir opsionni sotib olishga majbur qilish taqiqlanadi. Shuningdek, xodimlarga aksiyalarni sotish uchun ularning ish haqi, mukofotlar, ish haqiga qo‘shimcha to‘lovlar, ustamalar va boshqa to‘lovlaridan ushlab qolish taqiqlanadi.
Egalik qilish rejasi haqidagi hujjat aksiyadorlarining umumiy yig‘ilishi tomonidan tasdiqlanadi.
Egalik qilish rejasi haqidagi hujjatda jamiyat tomonidan xodimlarga aksiyalarni sotish yoki aksiyalarga doir opsionni sotish (berish) shartlari va tartibi hamda egalik qilish rejasi bilan bog‘liq boshqa muhim shartlar ko‘rsatiladi.
Jamiyat egalik qilish rejasi joriy etilganligi haqidagi axborotni u joriy etilgan kundan boshlab 2 ish kuni ichida o‘z veb-sayti va Korporativ axborotning yagona portalida joylashtirish yo‘li bilan oshkor qilishi shart.
Jamiyat egalik qilish rejasi haqidagi hujjat tasdiqlangan kundan boshlab 15 kundan kechiktirmay ushbu hujjat bilan barcha xodimlarni tanishtirishi lozim.
