Mansurbek Yo‘ldoshev – “Aminboy Sharwa” fermer xo‘jaligi raisi. Uning Kun.uz'ga aytishicha, 26 sentabr kuni soat 17:00 atrofida IIB xodimlari uning dala maydoniga bir nechta avtomashinalarda kelib, xo‘jalik ishchisining telefonini olib qo‘yib, ishchini mashinalardan biriga o‘tqazib, olib ketishgan.
IIB xodimlari o‘zlari bilan bitta “Belarus” va ikkita “New Holland” traktorlarini dalaga boshlab kelib, 14 gektarda pishib turgan sholini payhon qilishdi, deydi u.
Dehqonning so‘zlariga ko‘ra, rasmiylar bu ishlari bilan uning asosiy daromadini yo‘q qilishgan.
Holat borasida Kegeyli tuman IIBning munosabatini so‘radik, ayni paytda izoh berilishi kutilmoqda. Ekinni buzish jarayonida bevosita qatnashgani aytilayotgan ichki ishlar xodimlaridan biri esa telefon orqali muloqotda Kun.uz muxbiri ekanimni aytishim bilan, go‘shakni o‘chirib qo‘ydi.
Mansurbek Qoraqalpog‘iston Respublikasining Kegeyli tumanida fermerlikni 10 yil oldin boshlagan: qariyb 70 gektar o‘nqir-cho‘nqir tashlandiq yerni olib, chorvachilik yo‘nalishida faoliyatini yo‘lga qo‘ygan. Biroq mahalliy hokimiyat uning egniga paxta va bug‘doy “reja”sini ham yuklagan. Fermerning chorvachiligi esa “saxovat”ga aylangan.
“Paxtadan foyda olmayman, bug‘doydan ham, chunki o‘zlari belgilagan narxda hosilni olishadi mendan. Chorva esa “saxovat”ga aylandi – go‘shtni yarmarkada (arzonlashtirilgan narxda – tahr.) sotasan deb majburlashadi”, – deydi “Aminboy Sharwa” fermer xo‘jaligi raisi.
Bu gaplarni eshitib, fig‘onim falak bo‘ladi: “Foydani qayerdan olasiz? Axir, xo‘jalik qayerdandir daromad olishi kerak!” – savol beraman fermerga. “Sholidan”, – deydi u.
“Bu tom ma’nodagi fermerchilik emas, hokimiyat bilan o‘ziga xos kelishuv bo‘yicha amalga oshirilayotgan yollanma faoliyat”, – degan xulosaga boraman:
“Chorva fermeri bo‘lasan, ammo paxta va bug‘doy yetishtirasan, molingni so‘yib, go‘shtini yarmarkaga berasan, foydangni o‘zing amallaysan”.
— Shunga ko‘ngansiz-da, shundaymi? – so‘rayman “fermer”dan.
— Shunday, boshqa iloj qancha – javob beradi u.
Qonunlarda bitilgan “fermer” tushunchasining asl ma’nosi boshqacha-ku! Bunaqa buzilgan almoyi-aljoyi “fermerchilik” bilan soha qayerga boradi, rivojlanishning barcha tamoyillariga zid-ku bu!
“Yaroqsiz yerni yer qilish uchun 600 million so‘mdan oshiq pulim ketdi. Endi mana daromadimning yagona manbasi – sholi ham nobud qilindi”, – deydi fermer. “Dardimni sizlarga aytdim, tezroq chiqaringizlar, iltimos, biz esa yerni tashlab uyimizga ketamiz, chunki... bosimlar boshlanadi”.
Sohadagi bedodlikning homiysi kim?
Shokir Sharipov
