Kiyev Xitoy va Braziliyaning Ukraina uchun «tinchlik tashabbusi»ni tanqid qildi va Shveytsariyani ushbu hujjatni qo‘llab-quvvatlagani uchun qoraladi. «Birlashgan Millatlar Tashkiloti Nizomiga aniq havola bo‘lmagan va Ukrainaning hududiy yaxlitligini to‘liq tiklashni kafolatlamaydigan har qanday tashabbuslar qabul qilinishi mumkin emas, bu kabi «tinchlik tashabbuslari» faqat muloqot illyuziyasini keltirib chiqaradi, tajovuzkor o‘zining jinoiy harakatlarini davom ettiradi», deyiladi Ukraina TIV 28 sentabr, shanba kuni e’lon qilgan izohida.
Hujjatda aytilishicha, Kiyev Ukraina prezidenti Volodimir Zelenskiy tomonidan taklif qilingan «tinchlik formulasi»ni «umumiy, adolatli va barqaror tinchlikka erishishning yagona yo‘li» deb biladi. «Ukraina uchun tinchlikka erishish yo‘llarini muhokama qilish uchun qo‘shimcha format va platformalar yaratishga hojat yo‘q. Tinchlik formulasi barcha g‘oyalarni muhokama qilish, turli qarashlar va tushunchalarni birlashtirish uchun to‘liq vositalar va mos platformalarni taqdim etadi», — deya ta’kidlaydi Ukraina TIV.
Press-relizda aytilishicha, Ukraina nuqtayi nazaridan, barcha tinchlik muhokamalari BMT Nizomiga asoslangan «Ukrainasiz Ukraina haqida hech narsa» tamoyilini hisobga olishi va xalqaro miqyosda Ukrainaning suvereniteti va hududiy yaxlitligini hurmat qilishni o‘z ichiga olishi kerak.
Shveytsariya TIV vakili XXR va Braziliyaning tinchlik tashabbusi haqida
Avvalroq, 27 sentabr kuni Shveytsariya tashqi ishlar departamenti (TIV) rasmiy vakili Nikolya Bido Keystone-SDA axborot agentligiga bergan izohida, uning mamlakati Xitoy va Braziliya tomonidan taklif qilingan Ukraina uchun tinchlik tashabbusini ma’qullashini ma’lum qilgan edi. U o‘t ochishni to‘xtatishga chaqiradi va mojaroga siyosiy yechim topishga qaratilgan.
Iyun oyida Byurgenshtok kurort shahrida Ukraina bo‘yicha Global tinchlik sammitiga mezbonlik qilgan Shveytsariya 27 sentabr kuni BMT Bosh Assambleyasi doirasida Xitoy va Braziliya tashabbusi bilan tashkil etilgan yig‘ilishga kuzatuvchi sifatida taklif qilindi.
«Biz ushbu uchrashuvda kuzatuvchi sifatida ishtirok etdik va bu dinamikani qo‘llab-quvvatlaymiz», — deya Bidoning tadbir haqida so‘zlaridan iqtibos keltirdi Reuters. Shveytsariya TIV vakilining ta’kidlashicha, aynan Xitoy tomonidan may oyida ilgari surilgan tinchlik tashabbusiga qo‘shilgan BMT Nizomiga havola Bernning ushbu hujjatga munosabatini o‘zgartirgan.
«O‘z navbatida, bu bizning ushbu tashabbusga bo‘lgan nuqtayi nazarimizni sezilarli darajada o‘zgartirishga olib keladi. Xitoy-Braziliya guruhi tashabbusi bilan boshlangan maxsus diplomatik sa’y-harakatlar bizni qiziqtirishi mumkin», — deya Bido so‘zlarini keltirmoqda Reuters.
O‘z navbatida, Shveytsariyaning Swissinfo internet nashri Tashqi ishlar vazirligi vakilining quyidagi bayonotini keltiradi: «Ushbu tashabbus Ukraina va Rossiya tomonlari tomonidan shu hafta BMTda qilingan jangovar nutqlarga muqobil variantni taklif qiladi. Shveytsariya tinchlik tashabbuslarida BMT Nizomiga murojaat qilishning ahamiyatini doimo ta’kidlab kelgan».
«Janob Bido so‘zlariga ko‘ra, Xitoy tashqi ishlar vaziri (Van I) shu hafta BMT Xavfsizlik Kengashida ushbu tashabbus kontekstida BMT Nizomining ahamiyati haqida gapirdi. Shveytsariya TIV ma’lumotlariga ko‘ra, ushbu tashabbus Birlashgan Millatlar Tashkiloti Nizomiga to‘g‘ri keladi», — deb ta’kidlaydi Swissinfo nashri.
