Makron: Yevropa Kiyevga xavfsizlik kafolatlarini berishga tayyor

Yevropa Ukrainaga xavfsizlik kafolatlarini, jumladan, mamlakatga tinchlikparvar kuchlarini yuborishga tayyor. Bu haqda Fransiya prezidenti Emmanuel Makron 24 fevral, dushanba kuni Vashingtonda AQSh prezidenti Donald Tramp bilan Ukrainadagi urushni tugatish yo‘llari muhokama qilingan muzokaradan so‘ng aytib o‘tdi.

Shu bilan birga, sulhni ta’minlash uchun AQShning «kuchli» ishtiroki zarur, dedi Makron. Bundan tashqari, uch yildan beri davom etayotgan keng ko‘lamli urushni tugatish uchun muzokaralarda Ukraina hukumatining ishtiroki zarur, deya qo‘shimcha qildi u. Makron, shuningdek, maqsadi Ukrainada mustahkam tinchlik o‘rnatish ekanini ta’kidladi.

Tramp: Putin Ukrainaga tinchlikparvar kuchlarni yuborishga rozi

O‘z navbatida, Tramp AQSh ehtimoliy o‘t ochishni to‘xtatish uchun xavfsizlik chorasi sifatida Ukrainaga Yevropa tinchlikparvar qo‘shinlarini yuborish g‘oyasini qo‘llab-quvvatlashini aytdi. Oq uy rahbarining so‘zlariga ko‘ra, u bu g‘oyani Rossiya prezidenti Vladimir Putin bilan muhokama qilgan. U go‘yo bunday variantni qabul qilishini aytgan, deya qo‘shimcha qildi Amerika prezidenti.

Shu bilan birga, Tramp yaqin haftalarda Ukrainadagi urush ehtimoliy yakunlanishini ma’lum qildi. «O‘ylaymanki, biz bir necha hafta ichida bu ishni tugatishimiz mumkin. Agar biz aqlli bo‘lsak. Agar aqlli bo‘lmasak, bu davom etadi va biz o‘lmasligi kerak bo‘lgan yosh, go‘zal insonlarni yo‘qotishda davom etamiz. Va biz buni xohlamaymiz», dedi AQSh prezidenti. «Ukraina bosib olgan hududlarini berishi kerakmi?» degan savolga u: «Ko‘ramiz», deb javob berdi.