16 sentabr kuni Tog‘-kon sanoati va geologiya vazirining birinchi o‘rinbosari O.Nasriddinxo‘jayev hamda O‘zbekistondagi AQSh favqulodda va muxtor elchisi Jonatan Henik foydali qazilmalar bo‘yicha hamkorlikni mustahkamlash maqsadida muhim minerallar sohasida (CRM) o‘zaro anglashuv memorandumini imzoladi.

2023 yil sentabrda Nyu-York shahrida bo‘lib o‘tgan sammitda ikki davlat rahbari foydali qazilmalar bo‘yicha muloqotni boshlash niyatida ekanligini e’lon qildi. Mazkur memorandum AQSh va O‘zbekistonning ushbu sa’y-harakatlarni ilgari surish, iqtisodiy hamkorlikni mustahkamlash yo‘lidagi dastlabki odimlaridan biri bo‘ldi.

Kelishuvdan ko‘zlangan maqsad mamlakatlar o‘rtasida muhim minerallar sohasidagi hamkorlik aloqalarini yanada mustahkamlash, boshqa yo‘nalishlardagi aloqalarni ham rivojlantirishdan iborat. Ta’kidlanishicha, ushbu hujjat muhim minerallar sohasida AQSh – O‘zbekiston muloqotining davom etishiga, geologiya qidiruv, qazib olish va yuqori qiymatli mahsulot zanjirini yaratish yo‘lida muhim qadam bo‘lib xizmat qiladi.