Qashqadaryo viloyati, Ko‘kdala tumani soliq inspeksiyasining xodimlari «davlat xizmatchisi axloq-odob qoidalariga zid ish qildi». Bu haqda Davlat soliq xizmati xabar berdi.

Avvalroq, soliqchilar restoranda qarzga yeb-ichib, keyin tadbirkorni «tekshirgani va qamatib yuborgani» haqida maqola e’lon qilingan edi.

Davlat soliq xizmatining maqolaga bildirgan munosabatida qayd qilinishicha, soliqchilar 12 avgust kuni tumandagi «Xondamir farovonlik fayzi» korxonasiga qarashli umumiy ovqatlanish shoxobchasida taomlangan va to‘lovni qarz sifatida yozdirib ketgan. Bu davlat xizmatchisi axloq-odob qoidalariga zid ekani, ammo 14 avgust kuni qarz to‘langani ta’kidlanmoqda.

So‘ngra, «Xondamir farovonlik fayzi» korxonasining budjetdan 8,3 mln so‘m soliq qarzi mavjudligi sababli soliq inspeksiyasi xodimlari Q.Normurodov va A.Mamatov 19 avgustda mol-mulk xatloviga borganida, ish yurituvchi A.Yangiboyev tomonidan qarshilik ko‘rsatilgan.

Shundan so‘ng, soliq xodimlari ushbu holat yuzasidan qonuniy chora ko‘rish uchun huquqni himoya qilish organlariga tegishli hujjatlarni taqdim etgan. Jinoyat ishlari bo‘yicha Ko‘kdala tumani sudi tomonidan jamiyat ish yurituvchisi A.Yangiboyevga 6 sutka ma’muriy qamoq jazo chorasi tayinlangan. Ushbu qarordan norozi bo‘lgan fuqaro A.Yangiboyevning arizasiga asosan apellyatsiya shikoyatidan so‘ng jazo chorasi 3 sutkaga kamaytirilgan.

Davlat soliq xizmatining ta’kidlashicha, holat yuzasidan xizmat tekshiruvi tayinlangan.