Saksoniya va Tyuringiya landtaglariga 1 sentabr kuni bo‘lib o‘tgan saylov natijalari, unda Kiyevga qurol yetkazib berishga qarshi bo‘lgan va Ukrainadagi urushni diplomatik yo‘llar bilan to‘xtatish tarafdori bo‘lgan partiyalar saylovchilarning katta qo‘llab-quvvatloviga ega bo‘lishi Berlinning Ukrainaga yordamni davom ettirish qaroriga ta’sir qilmaydi. Bu haqda 2 sentabr, dushanba kuni Germaniya hukumati matbuot kotibi o‘rinbosari Kristian Xoffman Berlindagi matbuot anjumanida ma’lumot berdi.
Savol shunday edi: «Berlinning Ukrainani qo‘llab-quvvatlash bo‘yicha pozitsiyasi, bu qo‘llab-quvvatlashga qarshi bo‘lgan tomonlar Saksoniya va Tyuringiya landtaglariga saylovlarda juda kuchli natijalar ko‘rsatganini hisobga olsak, o‘zgaradimi?»
«Bizning pozitsiyamiz, Germaniya federal hukumatining Ukrainaga nisbatan pozitsiyasi mutlaqo aniq, biz Ukrainani Rossiya urushiga qarshi mudofaa kurashida qo‘llab-quvvatlaymiz, buni federal kansler va boshqalar bir necha bor ta’kidlagan. Agar kerak bo‘lsa - harbiy, gumanitar, moliyaviy sohalarda juda keng qamrovli vositalarni jalb qilgan holda buni davom ettiramiz», deb ta’kidladi Xoffman.
Undan oldin u Saksoniya va Tyuringiyadagi mahalliy saylovlar natijalari haqida izoh bermasligini ta’kidladi, chunki Olaf Shols avvalroq Germaniya Sotsial-demokratik partiyasidan (GSDP) deputat sifatida ushbu mavzuda gapirgan edi.
Germaniyadagi mahalliy saylovda urushdan keyingi tarixda birinchi marta o‘nglar g‘alaba qozondi
Germaniyaning sharqiy qismidagi Turingiya federal yerida Landtag (yer parlamenti)ga saylovlarda o‘ta o‘ng «Germaniya uchun muqobil» (GuM) partiyasi g‘alaba qozondi.
Buni Germaniyaning ARD jamoat televideniyesining ekzitpol ma’lumotlari tasdiqlaydi.
So‘rov natijalariga ko‘ra, «Germaniya uchun muqobil» 30,5 foiz ovoz bilan yetakchilik qilmoqda.
Shu tariqa, urushdan keyingi tarixda birinchi marta o‘ta o‘ng partiya Germaniyada yer saylovlarida birinchi o‘rinni egalladi.
Germaniya Ukrainaga havo hujumidan mudofaa tizimini topshirdi
Germaniya Ukrainaga IRIS-T havo hujumidan mudofaa tizimini topshirdi. Bu haqda Germaniya hukumati veb-saytidagi xabarda aytilgan.
Komplekslar Kiyevga yangi harbiy yordam paketining bir qismi sifatida yetkazilib berildi.
To‘plamga quyidagilar ham kirdi: Bergepanzer 2 evakuatsiya mashinasi, 26 ta «Vektor» razvedkachi uchuvchisiz uchish apparatlari, 6 ta muhandislik ekskavatori, 14 000 ta 155 mm snaryadlar, 55 000 ta birinchi tibbiy yordam to‘plami va miltiqlar.
YeI Germaniyada Ukrainaga yordam masalasidagi bahslardan xavotirda
Germaniyaning yaqin yillarda Ukrainaga harbiy yordamini qisqartirishi «juda tashvishli bo‘ladi», dedi Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel 23 avgust kuni Ispaniyaning Santander shahrida so‘zlagan nutqida. «Shu paytgacha Germaniya Ukrainaning eng yirik qo‘llab-quvvatlovchisi bo‘lib kelgan, deya qo‘shimcha qildi Borrel. Uning ta’kidlashicha, bugungi kunda Berlin Yevropa Ittifoqining Kiyevga umumiy yordamiga juda katta hissa qo‘shmoqda.
Kiyevga harbiy yordamni davom ettirish haqidagi munozaralar Berlinning 2025 yildayoq uning hajmini kamaytirish rejalari fonida davom etmoqda. Frankfurter Allgemeine Sonntagszeitung (FAS) gazetasi 17 avgust kuni Germaniya hukumati Ukrainaga yaqin kelajakda qo‘shimcha moliyaviy yordam bermoqchi emasligini yozdi. FAS ichki hukumat hujjatlari va o‘z manbalaridan aniqlashicha, Kiyevga faqat ilgari ma’qullangan yordam ko‘rsatiladi, kansler Olaf Sholsning iltimosiga binoan Germaniya Mudofaa vazirligining boshqa so‘rovlari tasdiqlanmaydi. FAS ma’lumotlariga ko‘ra, bu haqda Germaniya moliya vaziri Kristian Lindnerning 5 avgustda mudofaa vaziri Boris Pistoriusga yo‘llagan maktubida aytilgan.
