Internetning Rossiya segmentidagi aloqa operatorlari YouTube video-platformasi sekinlashuvini bartaraf etadigan yechimlarni amalga oshirishni to‘xtatishlari kerak edi. Tegishli mazmundagi axborot byulleteni Aloqa, axborot texnologiyalari va ommaviy kommunikatsiyalarni nazorat qilish federal xizmatining (Roskomnadzor) asosiy radiochastota markazi tomonidan yuborilgan. Ushbu hujjat nusxasi SOTAvision (SOTA) nashrining Telegram-kanalida 28 avgust kuni joylashtirildi.
Operatorlar «internet-trafikni buzish, parchalash va almashtirish texnologiyalaridan» voz kechishga chaqirildi.
Markaz 2 sentabrgacha xatda ko‘rsatilgan elektron manzilga «ko‘rilgan chora-tadbirlar to‘g‘risida ma’lumot» yuborilishini buyurdi.
OAV: Qidiruv tizimlari YouTube kontentini ko‘rsatishni kamaytirdi
Ayni paytda, «Izvestiya» gazetasining xabar berishicha, internetning Rossiya segmentidagi qidiruv tizimlari YouTube kontenti ko‘rsatilishini kamaytirdi va platforma endi qidiruv natijalarida birinchi o‘rinni egallamayapti. Endilikda, nashrga ko‘ra, birinchi navbatda Rutube, VK Video va rus onlayn kinoteatrlari kontenti namoyish etiladi.
Rossiya platformalari pozitsiyalarining yaxshilanishi ham foydalanuvchilar harakatlari (so‘rovlar soni ko‘payishi), ham qidiruv tizimlari bilan bog‘liq bo‘lishi mumkin, deb tushuntirdi Rossiya elektron aloqa assotsiatsiyasi direktori Sergey Grebennikov. Shunday qilib, «Yandeks» videolarni faqat kontentni yuklashda muammo bo‘lmagan platformalardan ko‘rsatish imkonini beradi, deya aniqlik kiritdi «Izvestiya» gazetasi.
YouTube Rossiyada rasman taqiqlanmagan
Rossiya Federatsiyasida YouTube taqiqlangan platformalar reyestriga kiritilmagan va rasman bloklanmagan.
«Biz bunda hech qanday huquqbuzarlikni ko‘rmayapmiz (sekinlashuvni bartaraf etishga urinishlar), YouTube’dan foydalanishda hech qanday rasmiy cheklovlar yo‘q», dedi «Rosteleset» mintaqaviy operatorlari assotsiatsiyasi rahbari Oleg Grishchenko.
O‘z navbatida, Moskvaning Birinchi raqamli advokatlar assotsiatsiyasi a’zosi Yekaterina Abashina trafik manipulyatsiyasi operatorlar uchun «xatarlarga ega» va ma’muriy kodeksning «litsenziyadan mahrum qilish» hamda jazolanishga olib kelishi mumkinligi haqida fikr bildirdi.
Kursk yaqinida Ukraina hujumi paytida sekinlashuv
Ukraina qurolli kuchlarining Kursk viloyatidagi hujumi fonida Rossiyadagi eng ommabop video-platformaga kirishda muammolar yuz berdi.
Iyul oyi o‘rtalarida «Rostelekom» Rossiya Federatsiyasidagi foydalanuvchilar uchun YouTube ishida uzilishlar kuzatilishi mumkinligi haqida ogohlantirgan edi. Davlat dumasi deputati Aleksandr Xinshteyn 25 iyul kuni Rossiya rasmiylari yaqin kelajakda YouTube ishini sekinlashtira boshlashi haqida ogohlantirdi. Parlament a’zosi so‘zlariga ko‘ra, avgust oyining boshiga kelib, servisni statsionar kompyuterlarda yuklab olish tezligi 70 foizgacha kamayishi kerak edi.
Iyul oyi boshida YouTube Yevropa Ittifoqining Rossiyaga qarshi sanksiyalari 14-paketiga kiritilgan qo‘shiqchilar Yaroslav Dronov (Shaman) va Polina Gagarina rasmiy kanallarini bloklab qo‘ydi. Oleg Gazmanov, Yuliya Chicherina, Grigoriy Leps va ko‘plab mehmonlari Ukrainadagi Rossiya urushini ochiq qo‘llab-quvvatlagan «Empatiya Manuchi» shousi muallifi Vyacheslav Manucharovning kanallari ham bloklandi.
