IT sohasida bir qancha muvaffaqiyatli loyihalar asoschisi Akmal Payziyevning Telegram nikidan foydalangan firibgarlar uning tanishidan 50 ming dollar ekvivalentida pul olishgan. Bu haqda tadbirkor o‘zining Telegram-kanalida yozdi.

“Do‘stlar, 2 oy avval mening tanishlarimga mening nomimdan Telegram'da yordam so‘rab, tezda kripto yuborishlarini iltimos qilgan xabarlar kelishni boshladi. Men Telegram profilimni buzishgan deb o‘yladim. U yerda mening nikim (@akmalpaiziev) ishlatilgan. O‘sha paytda bir necha kishi menga qo‘ng‘iroq qilib yozishdi, men bu men emasligimni aytdim va unutdim. Bugun ertalab Stenforddagi kursdoshim menga yozdi va nikni tekshirib, 50 ming dollar kriptoda yuborganini aytdi. Ma’lum bo‘lishicha, soxta nikda “l” (l) harfi o‘rniga firibgarlar katta harf bilan yozilgan “I” harfini ishlatishgan.

Keyinchalik tushundimki, mening barcha kontaktlarim TexMe dasturi orqali sizib chiqqan, bu dastur orqali men barcha internet xizmatlari uchun qo‘ng‘iroqlar va tasdiqlashlarni olish uchun Amerika raqamiga ega bo‘ldim. Ehtiyot bo‘ling. Hozirda profillarni, rasmlarni, videolarni va ovozni soxtalashtirish mumkin. Shaxsni ovoz bilan tasdiqlash, shaxsiy savollar berish yoki hujjatlashtirilmagan xotiralar haqida so‘rash yaxshiroq”, – deya yozgan tadbirkor.

Oxirgi paytlarda Telegram va boshqa messenjerlar orqali kimningdir shaxsiy ma’lumotlaridan foydalanib, uning tanishlaridan pul o‘g‘irlash nihoyatda ommaviylashdi. Ko‘plab holatlarda firibgarlar akkaunt egasini go‘yoki og‘ir ahvolda qolib, shoshilinch pulga muhtojdek qilib ko‘rsatishadi.

Bunda tanish inson bilan avvalgi shaxsiy yozishmalarga qarash, firibgar pul o‘tkazishni so‘ragan bank kartasi yoki hisobraqamning kimga tegishliligiga e’tiborli bo‘lish, shuningdek, Akmal Payziyev yozganidek, suhbatdoshdan ovozli xabar yuborishini so‘rash, unga shaxsiy masalalarda turli savollar berish talab etiladi.