Yevropadagi eng faol Etna vulqoni 4 avgust, yakshanba kuni yana uyg‘ondi. Ayni vaqtda ulkan kul ustuni bir necha kilometrga ko‘tarilgan, kraterdan esa lavalar oqmoqda, deb xabar beradi Euronews.

Vulqon harakatga kelgani tufayli Italiyadagi Kataniya xalqaro aeroporti reyslar sonini soatiga oltitagacha chekladi, ayrimlarini Sitsiliyadagi boshqa aeroportlarga yo‘naltirdi.

Yakshanba tongida Italiya vulqonshunoslik va geofizika milliy instituti Voragin krateridan chiqayotgan «lava fontanlari» va sharq hamda janubi-sharqiy yo‘nalishda harakatlanayotgan «vulqon bulutlari» haqida ma’lumot berdi. Bulut yo‘lida uchragan yo‘llar va aholi punktlari qalin kul bilan qoplangan.

Vulqon uyg‘onishidan eng ko‘p zarar ko‘rgan Giarre shahri meri baxtsiz hodisalarning oldini olish uchun hatto yo‘llarda harakatlanayotgan avtomobillar tezligini pasaytirish bo‘yicha buyruq berdi. 

Etna — Sitsiliya sharqiy qirg‘og‘ida joylashgan, Yevropadagi eng faol vulqondir. Joriy yozning o‘zida vulqon bir necha bor uyg‘ondi. Iyul oyida Kataniya aeroporti uchish-qo‘nish yo‘lagi kul bilan qoplanib qolgani sabab o‘z faoliyatini ikki marta to‘xtatishga majbur bo‘ldi.

Shu bilan birga ta’kidlanishicha, vulqonning faolligiga qaramay? lava 19 asr boshidan beri yaqin shaharlarga qadar yetib kelmagan. Etnaning 200 dan ortiq kraterlari mavjud, ulardan biri otilsa, vulqonning qora kuli Kataniya va atrofdagi boshqa shaharlarni qoplaydi. Iyul boshlarida Italiya hukumati Sitsiliya shimolida joylashgan Stromboli vulqoni otilishi xavfi sabab trevoganing qizil darajasini e’lon qilgandi.