Chorakfinalda -57 kg vaznda Abdumalik Xalokov ispaniyalik Xose Kuiles Brotonsni, -71 kg vaznda Asadxo‘ja Mo‘ydinxo‘jayev esa daniyalik Nikolay Terteryanni 5:0 hisobida mag‘lub etishdi va kamida bronza medalini kafolatlashdi. 

Xalokov final yo‘llanmasi uchun 8 avgust kuni avstraliyalik Charli Seniorga qarshi ringga ko‘tarilsa, Mo‘ydinxo‘jayev  6 avgust kuni amerikalik Omari Jons bilan ro‘baro‘ keladi.

Bungacha o‘zbekistonliklardan Lazizbek Mullojonov (-92 kg), Bahodir Jalolov (+92 kg) va Hasanboy Do‘smatov (-51 kg) ham yarimfinal masalasini ijobiy hal qilishgandi.

Shu tariqa O‘zbekiston delegatsiyasining Parij Olimpiadasida kafolatlangan medallari 8 taga yetdi. 5 bokschining qanday medal olishi yarimfinal yoki finallarda ma’lum bo‘ladi. Bundan tashqari avvalroq dzyudoda 1 ta oltin va 2 ta bronza qo‘lga kiritilgan.