O‘zbekiston delegatsiyasi Parij-2024 yozgi Olimpiya o‘yinlaridagi dastlabki medalini naqd qildi.

-52 kg vazn toifasida O‘zbekiston sharafini himoya qilayotgan dzyudochi Diyora Keldiyorova yarimfinalda mezbonlar vakili, Tokio Olimpiadasi finalchisi, uch karra Yevropa chempioni Amandin Busharni mag‘lubiyatga uchratishga muvaffaq bo‘ldi.

Endi u oltin uchun Tokio Olimpiadasi g‘olibi (-48 kg vaznda), kosovolik Distria Krasnichiga qarshi gilamga chiqadi. Kosovolik sportchi yarimfinalda Olimpiada o‘yinlarining ikki karra sovrindori, italiyalik Odette Jyuffridani mag‘lub etdi.

Keldiyorova hozirning o‘zida tarix yozdi va kamida kumush medalni naqd qilgan holda yozgi Olimpiya o‘yinlari tarixida eng yaxshi natija qayd etgan o‘zbekistonlik ayol bo‘ldi.

Bungacha yozgi Olimpiya o‘yinlarida Yekaterina Hilko bronza medal qo‘lga kiritgan (Pekin-2008, trampolinda sakrash) va ayollar orasida medal olgan yagona sportchi edi.

• Avvalroq, 26 yoshli o‘zbekistonlik dzyudochi nimchorakfinaldayoq yaponiyalik amaldagi Olimpiada chempioni Ute Abening 5 yillik mag‘lubiyatsiz seriyasiga barham berib, uni turnirdan chiqarib yuborgan, chorakfinalda germaniyalik Masha Ballhausni mag‘lub etgandi.
• Ma’lumot uchun, Keldiyorova Tokio-2020 Olimpiadasida ishtirok etib, dastlabki bosqichda turnirni tark etgandi.