Belgorod viloyatida 17 iyul, chorshanba kuni FPV dronining avtomobilga hujumi oqibatida ikki kishi halok bo‘ldi, deb xabar berdi Belgorod viloyati gubernatori Vyacheslav Gladkov. Dron yosh er-xotin bo‘lgan mashinaga hujum qildi. Mashinaning yonishi natijasida er-xotin tez yordam yetib kelguniga qadar voqea joyida vafot etgan.
Shu kuni, 17 iyulda Belgorod viloyatining Shebekino shahrining o‘qqa tutilishi natijasida uch nafar tinch aholi vakili yaralangan, deya xabar berdi Gladkov. Ikki erkak ko‘krak qafasining yumshoq to‘qimalaridan, yana biri yelkasidan jarohatlangan, barcha jabrlanganlar shifoxonalarga yetkazilgan.
Shu kuni ertalab Gladkov Shebekinskiy shahar okrugi Novaya Tavoljanka qishlog‘ida Ukraina Qurolli kuchlari tomonidan o‘qqa tutish natijasida bir fuqaro yaralangani haqida yozgan edi: bo‘ynidan jarohat olgan erkak viloyat klinik shifoxonasiga yotqizilgan.
18 iyulga o‘tar kechasi Vyacheslav Gladkov, shuningdek, Belgorod viloyatidagi yettita aholi punktiga, xususan: Valuyskiy shahar okrugidagi Stariy Xutor qishlog‘i, Mixaylovka qishlog‘i, Grayvoronskiy shahar okrugidagi Kozinka qishlog‘i, Shebekinskiy shahar okrugidagi Mokraya Orlovka, Novostroyevka-Pervaya, Voznesenovka va Murom qishloqlariga uchuvchisiz uchoq hujumi sodir etilgani haqida xabar berdi. Gubernatorning so‘zlariga ko‘ra, bu hujumlar natijasida uylar va mashinalar zarar ko‘rgan, biroq tinch aholi orasida jabrlanganlar yo‘q.
Kursk viloyati
Kursk viloyatida, gubernator Aleksey Smirnovning so‘zlariga ko‘ra, Tyotkino, Noviy Put, Politotdelskiy va Medvejye posyolkalarida, Volfino qishlog‘ida va Glushkovskiy tumanining Otruba xutorida, Sudjanskiy tumanidagi Novoivanovka qishlog‘i, Korenevskiy tumani Lyubimovka qishlog‘i, Rilskiy tumanidagi «Krupets» nazorat punktidan unchalik uzoq bo‘lmagan joyda «Ukraina kopterlaridan tashlashlar va kamikadze dron hujumlari» qayd etilgan.
«Ukraina kopterlari va kamikadze dronlarining hujumidan so‘ng Glushkovskiy, Sudjanskiy va Korenevskiy tumanlarida 8 nafar mahalliy aholi jarohatlandi, ularning ikki nafari kasalxonaga yotqizildi. Rasmiy va shaxsiy avtomashinalar, shuningdek, yuk mashinalari jiddiy shikastlangan», - deyiladi Smirnovning postida.
Kursk viloyati rahbarining so‘zlariga ko‘ra, 17 iyul kuni kun davomida chegara hududlarida radioelektron kurash vositalari yordamida Ukrainaning 6 ta uchuvchisiz uchog‘i yo‘q qilingan va zararsizlantirilgan.
Bryansk viloyati
Bryansk viloyatida, gubernator Aleksandr Bogomazning so‘zlariga ko‘ra, 2010 yilda tug‘ilgan o‘smir qiz 17 iyul kuni Suzemskiy tumani Zernovo qishlog‘ini o‘qqa tutish vaqtida yengil jarohat olgan. «U tibbiy muassasaga olib ketildi, u yerda barcha zarur tibbiy yordam ko‘rsatildi», — deyiladi xabarda.
17 iyul kuni ertalab Bogomaz Ukrainaning ikki uchuvchisiz uchog‘i Suraj tumani uzra yo‘q qilingani haqida xabar berdi.
