Pxenyan va Moskva o‘rtasidagi ittifoq mustahkamlansa, Shimoliy Koreya Ukrainaga qarshi urushda qatnashish uchun Rossiyaga 100 minggacha askar yuborishi mumkin. Bu haqda 17 noyabr, yakshanba kuni Bloomberg agentligi G20'ning bir qator mamlakatlari dastlabki baholari bilan tanish bo‘lgan suhbatdoshlariga tayanib xabar berdi.
KXDR bunday qadamga borishi shart emas, deya tushuntirdi agentlik suhbatdoshlari. Bundan tashqari, bunday miqyosdagi harbiy qo‘llab-quvvatlash yuz minglik qo‘shinni bir martalik o‘tkazishni anglatmaydi, balki Rossiya Federatsiyasida Shimoliy Koreya kuchlarining rotatsiyasini hisobga olgan holda umumiy soni bo‘ladi, deya ta’kidladi Bloomberg manbalari.
AQSh: KXDR askarlari allaqachon Ukrainaga qarshi urushda qatnashmoqda
Shimoliy Koreya askarlari hozirda Rossiya qo‘shinlari bilan birga Ukrainaga qarshi urushda qatnashmoqda. 12 noyabr kuni AQSh Davlat departamenti matbuot xizmati rahbari o‘rinbosari Vedant Patel Pxenyan tomonidan Rossiya sharqiga yuborilgan 10 mingdan ortiq qo‘shinning asosiy qismi Kursk oblastiga jo‘natilganini xabar qildi. U yerda Shimoliy Koreya askarlari «Rossiya Qurolli kuchlari bilan birgalikda jangovar harakatlarda qatnasha boshladilar», dedi u.
Ukraina prezidenti Volodimir Zelenskiy bir hafta oldin Shimoliy Koreya askarlari allaqachon Kursk oblastida Ukraina armiyasiga qarshi jangovar harakatlarda qatnashganini aytgan edi. KXDRning 11 ming askari hozirda Kreml qo‘shinlarini qo‘llab-quvvatlash uchun Kurskda bo‘lib turibdi va ular orasida «talafot ko‘rganlar ham bor», deb yozgan Zelenskiy.
