Talk kukuni saraton kasalligini keltirib chiqarishi mumkin. Bu haqda Jahon sog‘liqni saqlash tashkilotiga asoslanib Sog‘liqni saqlash vazirligi xabar bermoqda.

Ma’lum qilinishicha, Jahon sog‘liqni saqlash tashkiloti huzuridagi Xalqaro Saraton tadqiqotlari agentligi (IARC) talk kukunini potensial kanserogen moddalar (saraton kasalliklari rivojlanish xavfini oshiruvchi moddalar) ro‘yxatiga kiritgan. Buning uchun 13 mamlakatdan jalb etilgan 29 nafar ekspertdan iborat ishchi guruh o‘rganishlar olib borgan. Mazkur jarayonda talk kukunidan foydalangan ayollarda tuxumdon saratoni bilan kasallanish holatlari ko‘paygani hisobga olingan.

“Qolaversa, sellyuloza-qog‘oz sanoatida xotin-qizlarning talk bilan ta’sirlanishiga qaratilgan tadqiqotlar natijalari ham tahlil qilib chiqildi. Shu tariqa bu mineral 2A xavf guruhiga mansub, deb tasniflandi”, deyiladi xabarda.

Qo‘shimcha qilinishicha, talk kukuni bilan ishlov berilgan tajriba kalamushlarida xavfli o‘smalar rivojlanishi qayd etilgan.

Ma’lumot uchun, talk yer ostidan qazib olinadigan tabiiy mineral bo‘lib, ko‘pincha bolalar kukuni tayyorlashda qo‘llaniladi.