JSST: 1 mlrd inson eshitish qobiliyatini yo‘qotishi mumkin

Jahon sog‘liqni saqlash tashkilotining Rossiyadagi ofisi rahbari Botir Berdiqlichev bugungi kunda 1 milliarddan ortiq inson musiqa tinglash odatlari tufayli eshitish qobiliyatiga shikast yetkazish xavfi ostida ekanini ma’lum qildi.

«1 milliarddan ortiq yoshlar noto‘g‘ri tinglash odatlari tufayli eshitish qobiliyatini yo‘qotish xavfi ostida ekani juda tashvishli, ammo to‘g‘ri xatti-harakatlar bilan buning oldini olish mumkin», — deydi u.

JSST vakilining so‘zlariga ko‘ra, 2050 yilga borib, 2,5 milliardga yaqin odamning eshitish qobiliyatida buzilishlar kuzatiladi va kamida 700 million kishi eshitish qobiliyatini yo‘qotgani sababli reabilitatsiyaga muhtoj bo‘ladi.

Eshitish qobiliyatiga salbiy ta’sir ko‘rsatadigan omillardan biri — bu eshitish hujayralariga zarar yetkazishi mumkin bo‘lgan juda baland tovushlar ta’siri. Ammo vaqtida chora ko‘rish orqali buning oqibatida yuzaga keladigan holatlarning 60 foizining oldini olish mumkin. Eng samarali profilaktik chora — tinglashda xavfsizlik normalariga rioya qilishdir.

Musiqani xavfsiz tinglash uchun ma’lum standartlar mavjud, ammo ko‘plab yoshlar ularni e’tiborsiz qoldiradi, bu esa eshitish qobiliyatini yo‘qotish xavfini oshiradi. Hozirgi vaqtda dunyo aholisining taxminan 5 foizi eshitish qobiliyatini yo‘qotishdan aziyat chekmoqda.