Keniyada soliqni oshirish qonuni bekor qilinganiga qaramay, norozilik namoyishlari davom etmoqda. 20 dan ortiq odamning o‘limiga sabab bo‘lgan to‘qnashuvlardan so‘ng hukumat muxoliflari 27 iyun, payshanba kuni poytaxt Nayrobi, mamlakat janubi-sharqidagi Mombasa va janubi-g‘arbiy qismidagi Kisumu shaharlarida yana ko‘chaga chiqdi.

Keniyada norozilik namoyishlari hukumatning soliqlarni, jumladan, oziq-ovqatga soliqlarni oshirish niyati fonida boshlandi. 25 iyun kuni yuzlab odamlar Nayrobidagi parlament binosiga bostirib kirganida namoyishlar zo‘ravonlikka aylanib ketgan edi. Nayrobi gubernatori idorasida yong‘in chiqdi. Politsiya namoyishchilarga qarata o‘qotar qurollardan o‘q uzdi. Keniya Inson huquqlari bo‘yicha komissiyasiga ko‘ra, natijada 22 kishi halok bo‘lgan.

Keniya prezidenti Uilyam Ruto kecha soliqlarni oshirishdan bosh tortganini e’lon qildi, ammo tashkilotchilar o‘z tarafdorlarini namoyishlarni davom ettirishga chaqirdi.

Keniyada qashshoqlik ortib bormoqda

Keniyaliklar allaqachon mamlakatda yashash narxining juda yuqoriligidan aziyat chekmoqda. Hukumat soliqlarni oshirish zaruratini yuqori davlat qarzi va davlatga faoliyat uchun yangi asoslar berish bilan izohladi.

Iyun oyi o‘rtalarida hukumat namoyishchilarning bosimi ostida rejalashtirilgan soliqlarni oshirish bo‘yicha jarayon asosiy qismini bekor qilgan edi, ammo bu namoyishchilarni tinchlantirmadi.