Shimoliy Koreya Rossiyaga ichida besh millionga yaqin artilleriya o‘q-dorilari bo‘lishi mumkin bo‘lgan konteynerlar jo‘natdi. Bu haqda Janubiy Koreya mudofaa vaziri Shin Von Sik 14 iyun, juma kuni Bloomberg agentligiga bergan intervyusida aytib o‘tdi.
Vazirning ta’kidlashicha, Seul Shimoliy Koreyadan Rossiyaga kamida 10 000 ta yuk konteynerlari olib ketilganini qayd etgan. Uning so‘zlariga ko‘ra, Rossiya prezidenti Vladimir Putin, ehtimol, Pxenyanga yaqin kelajakda rejalashtirilgan tashrifi chog‘ida keyingi ta’minotni muvofiqlashtirishga harakat qiladi.
«Putin Shimoliy Koreya bilan xavfsizlik sohasida, ayniqsa, foydalanish uchun zarur bo‘lgan artilleriya snaryadlari kabi harbiy ta’minot sohasida yaqinroq hamkorlik qilishga intilishi kutilmoqda», - deya Shinning so‘zlaridan iqtibos keltiradi agentlik. Janubiy Koreya Mudofaa vazirligi rahbarining so‘zlariga ko‘ra, Pxenyan Rossiyaga o‘nlab ballistik raketalarni ham yuborgan.
Bunga javoban Moskva Shimoliy Koreyaga bir nechta ayg‘oqchi sun’iy yo‘ldoshlarni, shuningdek, tanklar va samolyotlar kabi oddiy qurollarni joylashtirish rejalarini amalga oshirishda yordam berish uchun texnologiyani topshirdi, deya ta’kidlaydi nashr.
Putinning Shimoliy Koreyaga rejalashtirilgan tashrifi
Rossiya prezidenti Vladimir Putin yaqin haftalarda Shimoliy Koreyaga tashrif buyurishni rejalashtirmoqda, deb xabar berdi «Vedomosti» gazetasi 10 iyun kuni diplomatik doiralardagi manbasiga tayanib. Hozir Putinning Pxenyanga tashrifiga «faol tayyorgarlik ko‘rilmoqda», dedi Rossiyaning KXDRdagi elchisi Aleksandr Matsegora nashrga. Bundan tashqari, «Vedomosti»ning yozishicha, Putin Vetnamga tashrif buyurish niyatida. Nashr manbalaridan biriga ko‘ra, ikkala safar ham iyun oyida bo‘lib o‘tishi mumkin.
«Vedomosti» qayd etishicha, Putinning KXDRga tashrifi chog‘ida Shimoliy Koreya ishchilarini Rossiyaga yuborish masalasi ham muhokama qilinishi mumkin. Reuters agentligining eslatishicha, Ukrainaga qarshi urush tufayli Rossiya iqtisodiyoti o‘tkir ishchi kuchi tanqisligiga duch kelmoqda, chunki ko‘plab erkaklar frontga jo‘natilgan, ularning bir qismi harbiy xizmatdan qochish uchun mamlakatni tark etgan.
Shimoliy Koreya rahbari Kim Chen In 2023 yil sentabrida Rossiyaga tashrif buyurib, zirhli poyezdda Uzoq Sharqqa kelgan edi. Tashrif davomida u Vladimir Putinni Shimoliy Koreyaga taklif qildi, Rossiya prezidenti bunga rozi bo‘ldi. Fevral oyida Kim Chen Inning tug‘ilgan kunida RF Shimoliy Koreya yetakchisiga Rossiyada ishlab chiqarilgan limuzin sovg‘a qilgan va shu bilan BMT Xavfsizlik kengashi tomonidan KXDR yadroviy dasturi tufayli Pxenyanga qarshi joriy qilingan sanksiyalarni buzgan edi.
Shu paytgacha Putin KXDRga faqat bir marta – Shimoliy Koreyani Kim Chen Ir boshqargan 2000 yilda, birinchi prezidentlik muddatining borgan.
