Ukrainaga qarshi urushda qariyb 700 ming rossiyalik harbiy xizmatchi qatnashmoqda, dedi Rossiya prezidenti Vladimir Putin 14 iyun, juma kuni «Qahramonlar vaqti» dasturi ishtirokchilari bilan uchrashuvda. «Mana, «Qahramonlar vaqti» dasturi - 80 kishi. Maxsus harbiy operatsiya zonasida esa bizda deyarli 700 ming bor», dedi Rossiya prezidenti.

Dekabr oyida Putin harbiy amaliyotlar zonasida 617 ming harbiy xizmatchi borligini aytgandi. Aprel oyida Rossiya Mudofaa vazirligi yil boshidan buyon 100 mingdan ortiq kishi shartnoma bo‘yicha xizmatga kirganini ma’lum qildi.

Ukraina prezidenti Volodimir Zelenskiy yanvar oyida Ukraina armiyasi soni 880 ming kishi ekanini aytgan bo‘lsa, bir oy avval Ukraina Qurolli kuchlarida 600 mingga yaqin odam jang qilayotganini ma’lum qilgan edi.

Rossiya armiyasi sonining ko‘payishi

Dekabr oyida Rossiya Qurolli kuchlarining soni 2 209 130 kishiga, shu jumladan 1 320 000 harbiy xizmatchiga ko‘tarildi (ilgari 2 039 758 kishi, shu jumladan 1 150 628 harbiy xizmatchi edi). Mudofaa vazirligi qurolli kuchlarning maksimal quvvati 170 ming kishiga oshirilganini ta’kidladi. «Rossiya Federatsiyasi Qurolli kuchlarida harbiy xizmatchilar sonini ko‘paytirish shartnoma asosida harbiy xizmatni o‘tash istagini bildirgan fuqarolar hisobidan bosqichma-bosqich amalga oshirilmoqda», — deyiladi idorada.

O‘tgan yilning iyun oyida Putin harbiy holat davrida shartnoma asosida harbiy xizmatga qabul qilishga yoki sudlangan fuqarolarni safarbar etishga ruxsat beruvchi qonunni imzolagan edi. Shartnoma bo‘yicha xizmatga faqat og‘ir yoki o‘ta og‘ir jinoyatlar (shu jumladan terrorizm va davlatga xiyonat) sodir etgan shaxslar qabul qilinishi mumkin emas.