Tesla elektromobillar ishlab chiqaruvchisi aksiyadorlari kompaniya asoschisi va rahbari Ilon Maskka 56 milliard dollar (52,2 milliard yevro) miqdorida tovon puli to‘lashni qayta tasdiqladi, deb xabar bermoqda Reuters 13 iyun, payshanba kuni kompaniya bayonotiga tayanib. 

To‘lovning ma’qullanishi «Mask Tesla chakana investorlari tomonidan qo‘llab-quvvatlanayotganini ta’kidlaydi, ular aksariyati milliarderning ashaddiy muxlislari», — deyiladi nashrda. Reuters shuningdek, ba’zi yirik institutsional investorlarning qarshiligiga qaramay, taklif qabul qilinganini bildirdi. 

To‘lovlar paketi Amerika korporatsiyalari tarixidagi eng yirik paket bo‘ladi. 56 milliard dollarlik ko‘rsatkich Tesla aksiyalarining avvalgi narxini aks ettiradi. Joriy yil aprel holatiga ko‘ra, ularning qiymati pasaygani hisobga olinsa, Maskka to‘lovlar hajmi 44,9 milliard dollar yoki 46,5 milliard yevroga teng. 

Tesla aksiyadorlarining Ilon Maskka to‘lovlar bo‘yicha qarori 

Tesla elektromobillar chiqarish kompaniyasi direktorlar kengashi 2018 yilda Maskka o‘n yil muddatga tovon to‘lashga qaror qildi. Shartlar aksiyalarning bozor qiymati va biznes ko‘rsatkichlari bo‘yicha ulkan maqsadlarga erishilganligiga qarab kompaniya aksiyalari ko‘rinishidagi kompensatsiyani o‘z ichiga oladi. O‘sha yili Tesla aksiyadorlaridan biri paket hajmini haddan tashqari ko‘p deb hisoblab, Maskka qarshi sudga murojaat qildi. 

Yanvar oyida Delaver sudi Maskning bunday katta kompensatsiyaga haqli emasligi haqida qaror chiqardi va ko‘p milliard dollarlik to‘lov paketini «tushunib bo‘lmaydigan holat» deb atadi. 

Aksiyadorlarning to‘lovlarni qo‘llab-quvvatlash bo‘yicha takroriy qarori bu jarayonni bekor qilmaydi, deb ta’kidlaydi Reuters. Huquqshunoslar bu yana bir necha oyga cho‘zilishi mumkinligini istisno qilmaydi. Xususan, sud aksiyadorlarning ovoz berish natijalarini sinchiklab ko‘rib chiqishi va Maskdan nomaqbul ta’sir ko‘rsatmaganligini isbotlashni talab qilishi mumkin. Reuters agentligi Ilon Mask ushbu ish bo‘yicha yangi sud jarayonlariga duch kelishi mumkinligini istisno etmadi. 

Shu bilan birga, 13 iyun kuni Texasdagi Tesla aksiyadorlarining yillik yig‘ilishida kompaniya yuridik manzilini Delaverdan Texasga o‘tkazish taklifi ham ma’qullandi. Boshqa takliflar ham qo‘llab-quvvatlandi, jumladan, boshqaruv kengashining ikki a’zosi: Ilon Maskning akasi Kimbal Mask va mediamagnat Rupert Merdokning o‘g‘li Jyeyms Merdokni qayta saylash.