Ukrainada urushning 834-kuni o‘tdi. Asosiy ma’lumotlar:

• Bayden AQSh Ukrainaga Amerika qurollarini Rossiyaning ichkari hududlari, xususan Moskvaga zarba berish uchun qo‘llashga ruxsat bermaganini aytdi.
• Rostov oblastida ukrainlar droni hujumidan keyin Novoshaxtinskiy neft zavodi yonib ketdi.
• Belgorod oblastida ukrain dronlari neft bazaga hujum qildi.
• Politico: Ukraina hukumati ittifoqchilar berishni va’da qilgan F-16 qiruvchi samolyotlari uchun uchuvchilarni tayyorlash jarayoni kechikayotganidan norozi.
• Ukraina energetika vazirligi Financial Times nashrini «Rossiya manfaatlariga xizmat qiluvchi dezinformatsiya» tarqatishda aybladi.
• Moskvada Fransiya fuqarosi qo‘lga olindi. Tergov qo‘mitasi uni Rossiya harbiy sohasiga oid ma’lumotlar yig‘ishda gumonlamoqda.
• Xalqaro jinoiy sudga rossiyalik propagandachilar ustidan shikoyat qilingan. Huquq faollari Solovyov va Simonyanni hibsga olishga order berishni so‘rashgan.

Kun kadri. Volodimir Zelenskiy Ikkinchi jahon urushi faxriylari bilan

Ukraina prezidenti Volodimir Zelenskiy Ikkinchi jahon urushi davrida ittifoqchi qo‘shinlarning Normandiyaga tushirilishining (uni «D kuni» deb ham atashadi) 80 yilligi tadbirlarida ishtirok etdi. «Dunyoning birdamligi har qanday tajovuzkordan kuchliroqdir. Tarix isbotlagan: kuchlarni birlashtirib, hatto eng katta yovuzlikka qarshi turish va g‘alaba qozonish mumkin», — deya yozgan Zelenskiy o‘z telegram-kanalida marosimdagi ishtiroki haqida.

Marosimda qatnashgan urush faxriylaridan biri «Xalq xaloskori!» so‘zlarini aytib, Zelenskiyning qo‘lini o‘pishga harakat qilgan. Ukraina prezidenti uni to‘xtatgan, shundan keyin ular yana ma’lum vaqt gaplashib turishgan. Vladimir Putin va Rossiya hukumatining boshqa vakillari Normandiyaga ittifoqchilar desant tushirishining 80-yilligi tadbirlariga taklif etilmagan.

Ukraina qurolli kuchlarining Xarkiv yaqinidagi barqarorlashtirish punkti

Frontda shifokorlar ham harbiylar bilan yelkama-yelka turib xizmat qilmoqda va yarador jangchilarning hayotini asrab qolishga harakat qilmoqda. 2014 yildan Ukraina qurolli kuchlarida tibbiy yordam NATO standartlari bo‘yicha turli tabaqalarga ajratilgan. Birinchisi — oldingi chiziqda birinchi yordam ko‘rsatish, buni nafaqat tibbiy xodimlar, balki ba’zida yaradorning o‘zi ham amalga oshirishi mumkin. Ikkinchi daraja — harbiy harakatlar joyi yaqinidagi, yaradorni bir soatdan kamroq vaqt ichida yetkazib borish mumkin bo‘lgan tibbiyot punktlari tashkil etish. Ukraina qurolli kuchlarida ularni barqarorlashtirish punktlari deb atashadi.

 Uchinchi darajadagi tibbiy tashkilotlar deb harbiy harakatlar hududidan uzoqda joylashtirilgan va ixtisoslashtirilgan yordamlar ko‘rsatiladigan muassasalarga aytiladi — bunday joylarda murakkab operatsiyalar o‘tkazish, kompyuter yoki magnit-rezonansli tomografiya qilish mumkin. Yirik shaharlardagi klinik markazlar esa to‘rtinchi tabaqaga mansub. Bunday joylarda oldingi darajalarda uchramaydigan yuqori texnologiyali tibbiy yordamlardan foydalanish mumkin. Va nihoyat, beshinchi daraja — reabilitatsiya bilan shug‘ullanuvchi tashkilotlar.

Volgograd oblastida yoshlarning mudofaa-sport oromgohi

Rossiya hukumati Ukrainaga keng ko‘lamli bosqin boshlangach, maktab o‘quvchilari hamda talabalarni «harbiy-vatanparvarlik ruhida tarbiyalash»ga qaratilgan loyihalarni faol tarzda ilgari surishga kirishdi. Xususan, 2023 yil mayidan RFning 12 regionida «VOIN» nomli Yoshlarni harbiy sportga tayyorlash va vatanparvarlik ruhida tarbiyalash markazi, tashkilotchilarning qayd etishicha, uni tuzish g‘oyasini RF prezidenti Vladimir Putin qo‘llab-quvvatlagan.