Politsiya Polsha, Chexiya, Avstriya va Shveytsariyadan Germaniyaga kirishni xohlovchilarning hujjatlarini tekshirishi o‘z samarasini bermoqda, deb yozadi 1 iyun, shanba kuni Neue Osnabrücker Zeitung (NOZ) gazetasi. Tahririyat ma’lumotlariga ko‘ra, 2023 yil 16 oktyabrdan buyon Germaniya politsiyasi ushbu chora tufayli 36 mingdan ortiq chegarani noqonuniy kesib o‘tish holatlari va minglab boshqa huquqbuzarliklarni aniqlashga muvaffaq bo‘ldi.
2024 yilning 30 apreliga qadar Germaniyada kirish qoidalarini buzgan 36 161 nafar shaxs ro‘yxatga olingan, deya xabar beradi nashr. Bundan tashqari, 824 nafar shaxsni mamlakatga noqonuniy olib kirishda gumon qilinganlar aniqlangan. «Jami 7401 nafar muhojir kontrabandachilar xizmatidan Germaniyaga kirish va boshpana so‘rash uchun foydalangan», deb yozadi NOZ. Politsiya jurnalistlarga so‘nggi ma’lumotlarni taqdim eta olmadi.
Chegarada qo‘shimcha qo‘lga olishlar
Qayd etilishicha, xuddi shu davrda politsiya xavfsizlik xizmatining professional jargonida «bir vaqtning o‘zida ushlash» deb ataladigan hodisaga duch kelgan. Ma’lum bo‘lishicha, Yevropa Ittifoqi davlatlarining ichki chegaralaridagi nazorat qidiruvda bo‘lgan qo‘shimcha 31 205 kishini, shu jumladan tegishli taqiqqa qaramay Germaniyaga kirishga uringanlarni «bexosdan» aniqlashga muvaffaq bo‘lgan. Ko‘pchilik chegaradan qaytarilgan. 5 048 nafar qoidabuzar esa amaldagi orderlar asosida qo‘lga olindi.
Narkotik, qurollar, portlovchi moddalar
Bundan tashqari, 3527 ta holatda ichki ishlar organlari tomonidan giyohvand moddalar va qurollar musodara qilingan, shuningdek, portlovchi moddalarni saqlash bo‘yicha qonunbuzilish holatlari qayd etilgan.
Germaniya ichki ishlar vaziri Nensi Fezer bu natijalarni katta muvaffaqiyat deb baholadi. Chegara nazorati choralarini yana olti oyga - 15 dekabrgacha uzaytirishga qaror qilindi. Ushbu chora Bryussel tomonidan tasdiqlangan. Bu sanadan keyin Germaniyaning qo‘shni davlatlar bilan chegarasida nazorat yana uzaytirilishi ehtimoli bor.
NOZ ma’lumotlariga ko‘ra, hozirda Germaniyaning Polsha, Chexiya va Avstriya bilan umumiy uzunligi 2000 kmga teng chegaralarida 28 ta nazorat punkti faoliyat yuritmoqda.
