Fransiya Ichki ishlar vazirligining ichki xavfsizlik bosh boshqarmasi Parijdagi yozgi Olimpiya o‘yinlari vaqtida terakt tayyorlashda gumon qilingan 18 yoshli chechenistonlikni qo‘lga oldi. 31 may, juma kuni vazirlik matbuot xizmati tarqatgan bayonotda aytilishicha, matnda ismi ko‘rsatilmagan yigit shahardagi «Joffrua Gishar» stadionida terakt sodir etmoqchi bo‘lgan. Ushbu hujumning nishonlari futbol o‘yini paytida tomoshabinlar va politsiya bo‘lishi kerak edi.
Jinoyatchi deb taxmin qilingan shaxs 22 may kuni qo‘lga olindi, to‘rt kundan so‘ng unga jinoiy-terrorchilik hamjamiyati rahbari sifatida ayblov e’lon qilindi va hibsga olindi, deb xabar bermoqda BFM TV telekanali Milliy aksilterror prokuraturasiga tayanib. Telekanal ma’lumotiga ko‘ra, yigit Fransiyaga ota-onasi bilan 2023 yilda kelgan.
Fransiya Ichki ishlar vazirligi bu 26 iyulda boshlanadigan «Olimpiada o‘yinlari davomida to‘xtatilgan birinchi hujum rejasi»ligini va 2017 yildan beri Fransiya politsiyasi tomonidan barbod qilingan 50-terakt rejasi ekanligini ta’kidladi.
O‘yinlarda xavfsizlik choralari kuchaytirilishi kutilmoqda
Radikallar allaqachon Parijda bir nechta teraktlar uyushtirgan, ularning eng yirigi 2015 yil 13 noyabrda 130 kishining hayotiga zomin bo‘lgan, deb eslaydi AFP. Fransiya rasmiylari avvalroq Ukraina va G‘azo sektoridagi urushlar Olimpiada vaqtida zo‘ravonliklarga olib kelishi mumkinligidan xavotir bildirgan edi.
Fransiya prezidenti Emmanuel Makron aprel oyi o‘rtalarida Olimpiada vaqtida Rossiyaning Ukrainaga qarshi urushi, shuningdek, boshqa harbiy mojarolar, xususan, Yaqin Sharq va Sudandagi jangovar harakatlar to‘xtatilishiga umid bildirdi. U, shuningdek, bo‘lajak yozgi o‘yinlar vaqtida «Olimpiada sulhiga erishish uchun hamma narsani qilish» niyatida ekanini aytdi.
2024 yilgi yozgi Olimpiya o‘yinlari 26 iyuldan 11 avgustgacha bo‘lib o‘tadi. Musobaqalar asosan Parijda o‘tkaziladi, ammo ba’zi sport turlari bo‘yicha ular boshqa shaharlarda tashkillashtiriladi. Jumladan, Sent-Eten shahridagi «Joffrua Gishar» stadionida oltita futbol uchrashuvi rejalashtirilgan. 2024 yilgi Olimpiadada 10 million mehmon va 10 ming sportchi qatnashishi kutilmoqda.
