Yevropa komissiyasi (YeK) amalga oshirish uchun umumiy qiymati 1 milliard 31 million yevro bo‘lgan 54 ta mudofaa bo‘yicha qo‘shma tadqiqot va ishlanma loyihasini tanladi. Tanlov Yevropa mudofaa jamg‘armasi doirasida 2023 yil uchun arizalarni qabul qilish bo‘yicha so‘rov natijalariga ko‘ra amalga oshirildi, deb xabar berdi regulyator 16 may, payshanba kuni.

«Tanlangan loyihalar kibermudofaa, quruqlik, havo va dengiz urushi, kosmik himoya, kimyoviy, biologik, radiologik va yadroviy mudofaa kabi muhim sohalarda mudofaa qobiliyatining keng doirasi bo‘yicha texnologik mukammallikni qo‘llab-quvvatlash uchun mo‘ljallangan», deyiladi Yevropa komissiyasining Bryusselda e’lon qilingan kommyunikesida.

YeI harbiy ustuvorliklarini amalga oshirish

Hujjatga ko‘ra, yangi ishlanmalar Yevropa Ittifoqining harbiy salohiyat sohasidagi ustuvor yo‘nalishlarini amalga oshirishga yordam beradi, masalan, koinotga bo‘yicha  vaziyatdan xabardorlik va bo‘lajak asosiy jangovar tank uchun texnologiyalar. Shuningdek, gap katta hajmdagi strategik yuklarni havoda tashish, uchuvchisiz uchish tizimlariga qarshi kurashish texnologiyalari, og‘ir zirhli transport vositalari qismlarini takomillashtirish va boshqa loyihalar haqida bormoqda.

Tanlangan loyihalarni amalga oshirishda Yevropa Ittifoqiga a’zo 26 davlat va Norvegiyadan 581 yuridik shaxs ishtirok etadi. 

Yevropa mudofaa jamg‘armasi 2021 yilda Yevropa parlamenti tomonidan tasdiqlangan. Jamg‘armaga 2027 yilgacha bo‘lgan davr uchun taxminan 7,95 milliard yevro ajratilgan. Ulardan 2,65 milliardi ilmiy loyihalarga, 5,3 milliard yevro esa aniq ishlanmalarga ajratilishi kutilmoqda.