Litvada prezidentlik saylovlarining birinchi bosqichi bo‘lib o‘tdi. 13 may, dushanbaga o‘tar kechasi ma’lum bo‘lishicha, amaldagi davlat rahbari Gitanas Nauseda va bosh vazir Ingrida Shimonite ikkinchi bosqichda o‘tish huquqini qo‘lga kiritgan. Markaziy saylov komissiyasiga ko‘ra, ovozlarni sanab chiqish natijalariga ko‘ra, Nauseda 44 foiz, Shimonite esa 19 foiz ovoz olgan. Saylovda 59,4 foiz saylovchilar ishtirok etgan. 

«Ha, men birinchi raundda g‘alaba qozonishni xohlardim. Ammo, ikkinchi raundda g‘alaba uchun kurashishga tayyorman va buni uddalay olaman deb o‘ylayman», - deya Nausedadan iqtibos keltiradi Delfi. Shimonite, o‘z navbatida, ikkinchi bosqichga o‘tishini quyidagicha izohladi: «Ushbu bosqichda mening asosiy maqsadim ikkinchi bosqichga chiqish edi». 

Litva prezidentligiga saylovda jami sakkiz nafar nomzod ishtirok etdi. Ular orasida huquqshunos Ignas Vegele, ilgari antisemitizm kayfiyatidagi bayonotlari tufayli mandatdan mahrum qilingan Litva Seymining sobiq deputati Remigiyus Jyemaytaytis va boshqalar bor. 

Litvada saylovlarga parallel ravishda referendum o‘tkazilmoqda 

Litvada prezidentlik saylovlari bilan bir vaqtda qo‘sh fuqarolikni qonuniylashtirish bo‘yicha referendum bo‘lib o‘tmoqda. Buning uchun konstitutsiyani o‘zgartirish kerak. Yangi norma tasdiqlanishi uchun uni saylov huquqiga ega bo‘lgan mamlakat fuqarolarining kamida 50 foizi qo‘llab-quvvatlashi talab etiladi. 

1895 ta saylov uchastkasidan 1629 tasida saylov byulletenlarini sanab chiqish natijalariga ko‘ra, saylovchilarning 71,6 foizi ikki fuqarolikni yoqlab ovoz bergan, 26,1 foizi qarshi chiqqan.