Oq uy juma kuni ma’lum qilishicha, Qo‘shma Shtatlar Ukrainani Rossiya armiyasining kuchaygan hujumidan himoya qilish uchun qurol-yarog‘ bilan ta’minlash maqsadida kecha-yu kunduz ishlamoqda, bu mamlakatning ikkinchi yirik shahri - 1,5 million aholiga ega Xarkiv nishonga olingan.
Oq uy Milliy xavfsizlik kengashining strategik aloqalar bo‘yicha koordinatori Jon Kirbi jurnalistlarga «ruslar Xarkivga kattaroq hujumga tayyorlanayotgan bo‘lishi mumkin», dedi. Uning so‘zlariga ko‘ra, Rossiya Xarkiv masofasida uzoq masofaga o‘q uzishga tayyorlanayotgani haqida xavotirli alomatlar bor. «Shaharga to‘g‘ridan to‘g‘ri hujum qilishni o‘ylamasangiz, buni qilmaysiz», dedi Kirbi.
Ukraina Mudofaa vazirligi: Xarkiv viloyatining Rossiya bilan chegarasida janglar ketmoqda
Shu kuni Ukraina Mudofaa vazirligi Rossiya armiyasining Xarkiv viloyati chegarasida harakatlari faollashgani haqida bayonot berdi. Frontning ushbu sektorida mudofaani kuchaytirish uchun u yerga zaxira bo‘linmalari yuborildi, deb xabar qildi Mudofaa vazirligi.
«Volchansk yo‘nalishida ushbu 24 soat davomida dushman boshqariladigan havo bombalari ("KAB") yordamida havo hujumlarini amalga oshirdi, tunda ruslar artilleriya ko‘magida mudofaamizning oldingi chizig‘iga bosimni oshirdi», deyiladi bayonotda. Unga ko‘ra, «taxminan ertalab soat 5 da zirhli texnikalar niqobi ostida mudofaa chizig‘ini siqib chiqarishga urinish sodir bo‘ldi».
Rossiya harbiy Telegram-kanallari xabariga ko‘ra, Rossiya armiyasi Rossiya bilan chegaradan Xarkiv tomon yura boshlagan. Xususan, Goptovka, Krasnoye, Pilnaya, Strelechya, Volchansk va Borisovka chegaradosh aholi punktlarini ommaviy o‘qqa tutgan. Urushni o‘rganish instituti (ISW) fikricha, Rossiya bunday harakatlari bilan Xarkiv aholisini shaharga ehtimoliy hujumni kutib, qochishga majburlamoqchi.
AQSh Ukrainaga favqulodda harbiy yordam sifatida 400 million dollar ajratdi
Avvalroq 10 may kuni AQSh prezidenti Jo Bayden Ukrainaga mudofaa buyumlari, Mudofaa vazirligi xizmatlari va harbiy tayyorgarlik uchun 400 million dollargacha harbiy yordam ajratish haqidagi farmonni imzolagan edi.
Politico nashrining yozishicha, harbiy yordam paketiga Amerika harbiy omborlaridagi qurollar kiradi: Patriot havo hujumidan mudofaa raketalari, Stinger zenit raketalari, Bradley piyodalar jangovar mashinalari, MRAP zirhli mashinalari, tankka qarshi Javelin tizimlari va boshqa o‘q-dorilar.
Bundan tashqari, deb yozadi Reuters, Kiyevga artilleriya, NASAMS zenit-raketa komplekslari uchun o‘q-dorilar, tankka qarshi o‘q-dorilar, zirhli mashinalar va jang maydonida darhol foydalanish mumkin bo‘lgan o‘q-dorilar berilishi kerak.
