Ukraina Oliy radasi mamlakat agrar siyosat va oziq-ovqat vaziri Nikolay Solskiy, shuningdek, bosh vazir o‘rinbosari, jamoatlar, hududlar va infratuzilmani rivojlantirish vaziri Aleksandr Kubrakovning iste’fosi uchun ovoz berdi. 9 may, payshanba kuni ularning ishdan bo‘shatilishini mos ravishda 273 va 272 deputat qo‘llab-quvvatladi.

Solskiy yer uchastkalari bilan firibgarlikda gumon qilinmoqda

Ukrainaning Korrupsiyaga qarshi milliy byurosi (KQMB) avvalroq mamlakat agrar siyosat vaziri Nikolay Solskiyni 291 million grivna (taxminan 6,83 million yevro)lik davlat yerlarini egallab olish va yana 190 million grivna (taxminan 4,46 million yevro)lik yerlarga egalik qilishga uringanlikda gumon qilayotgani haqida xabar bergan edi. Shundan so‘ng Solskiy iste’foga chiqish to‘g‘risida ariza yozdi. Ertasi kuni sud uni hibsga olishga qaror qildi, ammo Solskiyga 75,7 million grivna (taxminan 1,78 million yevro) miqdorida garov puli belganilandi va u hibsdan ozod qilindi. Keyinchalik xuddi shu ish bo‘yicha uning o‘rinbosari Markiyan Dmitrasevich hibsga olingan.

Kubrakov ishdan bo‘shatilishi masalasi muhokama qilinmaganini aytdi

Ukraina jamoatlar, hududlar va infratuzilma vaziri Aleksandr Kubrakovning aytishicha, na mamlakat bosh vaziri Denis Shmixal, na «Xalq xizmatchisi» fraksiyasi rahbariyati u bilan uni ishdan bo‘shash qarorini muhokama qilmagan. «Men har doim ochiq muloqotga va vazirlikning o‘zimga tegishli barcha yo‘nalishlar bo‘yicha olib borayotgan ishlari bo‘yicha batafsil hisobot berishga tayyorman», — deb yozadi u o‘zining ijtimoiy tarmoqdagi sahifasida.