Yevropa Ittifoqi Suriyadan hozirda ushbu mamlakatda yashayotgan qochqinlar oqimini to‘xtatish uchun Livanga umumiy qiymati bir milliard yevroga yaqin moliyaviy yordam beradi. Yevrokomissiya rahbari Ursula fon der Lyayyen 2 may, payshanba kuni Bayrutda Livan bosh vaziri Najib Mikati va Kipr prezidenti Nikos Xristodulidis bilan muzokaralardan so‘ng bu mablag‘lar 2024 yildan 2027 yilgacha bo‘lgan davr uchun ajratilganini ma’lum qildi.

Fon der Lyayyenning so‘zlariga ko‘ra, Bryussel noqonuniy migratsiya oldini olishda samarali hamkorlikka umid qilmoqda. Livanni migratsiya siyosatida qo‘llab-quvvatlash uchun, migratsiya kelishuvining bir qismi sifatida Yevropa Ittifoqi Yevropaga qonuniy yo‘llarni ochiq saqlash va Livandan qochqinlarni YeIga joylashtirish majburiyatini oladi. 

Bundan tashqari, pul Livan qurolli kuchlari va boshqa xavfsizlik kuchlarini qo‘llab-quvvatlashga yo‘naltiriladi – gap, birinchi navbatda, chegara nazorati uchun kadrlarni jihozlash va o‘qitish haqida bormoqda. Yevropa yordami, shuningdek, Livanning sog‘liqni saqlash, ta’lim va ijtimoiy xizmatlar tizimini mustahkamlashga qaratilgan bo‘ladi. 

Yil boshidan beri Livandan 4000 suriyalik qochqin Kiprga keldi 

Livandan suriyalik qochqinlar soni ortib borayotgani Yevropa Ittifoqida, ayniqsa Kiprda xavotir bilan kuzatilmoqda. Prezident Xristodulidisning so‘zlariga ko‘ra, qochqinlar so‘nggi oylarda deyarli har kuni qayiqda kelmoqda. Yil boshidan beri ularning soni qariyb 4000 ga yetdi, 2023 yilning birinchi choragida esa Kiprga atigi 78 nafar muhojir yetib kelgandi. 

Kiprdagi qochqinlar lagerlari gavjum va orol davlati rasmiylari suriyaliklarning boshpana so‘rash arizalarini ko‘rib chiqishni to‘xtatdi. Ularning aksariyati Suriyadan kelib Livanda yashayotgan qochqinlardir. 5,3 million aholiga ega va o‘z tarixidagi eng og‘ir moliyaviy inqirozni boshidan kechirayotgan Livanda 1,5 milliondan ortiq suriyalik qochqin yashaydi.