Ispaniyada rossiyalik harbiy uchuvchi Maksim Kuzminovning o‘ldirilishi yangi tafsilotlari 31 mart, yakshanba kuni The New York Times gazetasida chop etildi. Ma’lumotni nashrga anonimlik sharti bilan tergovni boshqarayotgan ispan tergovchilari va Ukrainaning yuqori martabali amaldorlari taqdim etgan.
The New York Times xabariga ko‘ra, Kuzminov Ukrainani 2023 yil oktyabr oyida tark etgan, garchi unga vertolyot o‘g‘irlaganidan keyin Rossiyaga qarshi jang qilish uchun qolish taklif etilgan. Uchuvchi yashash uchun Ispaniyani tanladi, u yerda Igor Shevchenko nomi bilan O‘rta Yer dengizi sohilidagi Vilyaxoyos shahrida joylashdi.
Kuzminovning g‘alati tanlovi
Gazeta Kuzminov tanlovining g‘alatiligini ta’kidlaydi, chunki mintaqada Rossiyaning uyushgan jinoiy guruhlari faoliyat yuritadi, ularning ba’zilari Rossiya razvedka xizmatlari bilan bog‘liq. Rossiya hukumati uni o‘ldirmoqchi ekanligini bilgan Kuzminov ruslar va ukrainlar orasida mashhur bo‘lgan barlarga borib, u yerda pullarini sovurgan.
Igor Shevchenko familiyasi ostida yashagan uchuvchiga qotillar qanday qilib chiqqani hozircha aniqlanmagan, biroq ukrainalik ikki yuqori martabali amaldor NYT’ga u Rossiyada bo‘lgan sobiq sevgilisi bilan bog‘lanib, uni Ispaniyaga kelishga taklif qilganini aytgan. «Bu jiddiy xato edi», dedi rasmiylardan biri.
13 fevral kuni ertalab oq Hyundai Tucson Kuzminov yashagan turar joy binosining yerosti garajiga kirib kelgan. Mashina lift va ko‘chaga olib boradigan pandus o‘rtasida to‘xtagan. Fuqarolik gvardiyasi xodimining aytishicha, ikki jinoyatchi Kuzminovni bir necha soat kutgan. Taxminan soat 16:20 da u garajga kirib kelib, mashinani joylashtirgan va liftga qarab yo‘l olgan. Hujumchilar mashinadan tushib, Kuzminovni chaqirgan hamda unga olti marta o‘q uzgan. Yarador bir necha qadam tashlab, pandusga qulagan. Jinoyat joyini tark etayotib, hujumchilar o‘ldirilgan uchuvchining jasadi ustidan mashinani haydab o‘tgan. «Xabar aniq edi: men seni topaman, o‘ldiraman, ezib tashlayman va sharmanda qilaman», dedi Fuqarolik gvardiyasining yuqori lavozimli amaldori.
Makarov to‘pponchasidan gilzalar
Politsiya voqea joyida 9 mm kalibrli Makarov to‘pponchasi patronlaridan gilzalarni topdi, deb yozadi gazeta va ularni jinoyatchilarning kelib chiqishini ko‘rsatadigan dalil deb atadi. Politsiya vakillarining fikricha, garajdagi kuzatuv kamerasi tasvirlariga tushgan qalpoqda bo‘lgan ikki qotil aniq professionaldir - ular Kuzminovni tezda o‘ldirib, g‘oyib bo‘lgan.
Jinoyatchilarning qotillikdan bir necha kun oldin o‘g‘irlab ketilgan mashinasi voqea joyidan bir necha kilometr uzoqlikda topilgan. Tergovchilarning fikricha, mashina maxsus vositalar yordamida yoqib yuborilgan. Fuqarolik gvardiyasining maxsus bo‘linmasi tergovni qat’iy maxfiylik asosida olib bormoqda.
Yuqori martabali politsiya xodimlari NYT’ga aytishicha, Maksim Kuzminovning o‘ldirilishi 2019 yilda Berlinda chechen Zelimxon Xonqoshvilining o‘ldirilishi va 2018 yilda Britaniyaning Solsberi shahrida sobiq «GRU» zobiti Sergey Skripalga suiqasdga urinish bilan bir xil xususiyatlarga ega. Rossiya maxsus xizmatlari ushbu jinoyatlarda gumon qilingan. Farqi shundaki, Kuzminovning qotilligi aybdorlari hali topilmadi va gumondorlar bor-yo‘qligi haqida rasman xabar berilmadi.
New York Times ta’kidlashicha, Rossiya rasmiylarining qotillikdagi ishtiroki to‘g‘ridan to‘g‘ri izlari hali topilmagan, garchi El País gazetasi avvalroq Ispaniya razvedka xizmatlari «rus izi»ga shubha qilmasligini yozgan edi. Ispaniya rasmiylari hozircha voqeaga o‘ta ehtiyotkorlik bilan yondashyapti va Kremlga qarshi ayblovlar qo‘ygani yo‘q.
