Germaniya hukumati Kiyevga topshirishga qaror qilgan taqdirda, mamlakatga uzoq masofali TAURUS qanotli raketalari zaxirasini tiklash uchun ikki yil kerak bo‘ladi. Bu haqda Britaniyaning Financial Times (FT) gazetasi 15 mart, juma kuni ekspertlarga tayanib xabar berdi. Qanotli raketalarni ishlab chiqarishni ko‘paytirish yoki qayta tiklash «bir kechada sodir bo‘lmaydi - ishlab chiqarishni ko‘paytirish yoki qismlarni ishlab chiqarishni qayta tiklash kerak, ammo bularning barchasi vaqt talab etadi», deya Xalqaro strategik tadqiqotlar instituti eksperti Duglas Barridan iqtibos keltiradi nashr.
Taurus Systems direktori Yoaxim Knopf, agar buyurtma olinsa, raketa ishlab chiqarish tezda tiklanishi mumkinligiga ishontirdi, ammo tahlilchilarning fikriga ko‘ra, aslida TAURUS arsenalini to‘ldirish uchun taxminan ikki yil kerak bo‘ladi.
FT ta’kidlaganidek, ishlab chiqarish liniyalari hozirda to‘xtagan. Oxirgi marta ular 2019 yilda Janubiy Koreya hukumatidan buyurtma olinganida ishlagan. Financial Times gazetasi yozishicha, Germaniyaning Shrobenxauzen shahrida joylashgan zavodlar faqat sotilgan raketalarni ta’mirlaydi. Tahlilchilarning hisob-kitoblariga ko‘ra, har bir raketa buyurtma hajmiga qarab, taxminan 1,5 million yevro turadi.
Germaniyada nechta TAURUS raketasi bor?
Oslo universiteti ilmiy olimi Fabian Xoffmanning hisob-kitoblariga ko‘ra, Bundesverning arsenalida hozirda 600 ga yaqin TAURUS raketalari mavjud bo‘lib, ulardan faqat yarmi shay holatda.
Xoffman, shuningdek, TAURUS’ni Ukrainaga yuborishdan oldin, Yevropaning o‘z qurol zaxiralari haqida o‘ylash kerakligini ta’kidlaydi. «Raketa tizimlari zamonaviy jangovar sharoitlarda asosiy narsadir, bizning arsenalimizda ular yetarli emas va hozirda ularni ishlab chiqarmayapmiz», deb tushuntirdi ekspert.
Bir kun avval Germaniya Bundestagi deputatlari TAURUS raketalarini Ukrainaga topshirish bo‘yicha yangi rezolyutsiya loyihasiga qarshi ovoz berdi. Germaniya kansleri Olaf Shols avvalroq Kiyevga TAURUS yetkazib berish imkoniyatini bir necha bor rad etgan edi. Uning so‘zlariga ko‘ra, bunday raketalardan samarali foydalanish nemis qo‘shinlarining ishtirokini talab qiladi, biroq bu Germaniyaning Rossiyaning Ukrainaga qarshi urushida bevosita ishtirok etishiga olib keladi, u esa buni istamaydi.
