BMT bosh kotibi Antoniu Guterrish Ukrainaning Rossiya tomonidan egallab olingan hududlarida saylovlar o‘tkazilishini tanqid qildi. Uning eslatishicha, noqonuniy anneksiya qilishga urinish xalqaro huquqda hech qanday kuchga ega emas. Guterrishning so‘zlarini 15 mart, juma kuni uning matbuot kotibi Stefan Dyujarrik keltirdi.
«BMT Ukrainaning xalqaro tan olingan chegaralari doirasidagi suvereniteti, mustaqilligi, birligi va hududiy yaxlitligiga qat’iy sodiq qoladi», dedi Guterrish.
Birlashgan Millatlar Tashkiloti Xavfsizlik kengashi 15 martdagi yig‘ilishida saylov masalasini ham muhokama qilgan. 50 dan ortiq davlat qo‘shma bayonotda xalqaro huquqni buzgan holda egallab olingan Ukraina hududlarida Rossiya prezidenti saylovlari o‘tkazilishini keskin tanqid qildi.
Saylovlardagi nomzodlar
Saylovda to‘rt nafar nomzod ishtirok etmoqda: amaldagi prezident Vladimir Putindan tashqari, LDPRdan Leonid Slutskiy, Rossiya Federatsiyasi Kommunistik partiyasidan Nikolay Xaritonov va «Novyye lyudi» partiyasidan Vladislav Davankov o‘z nomzodlarini ilgari surdi.
Rossiya Federatsiyasini 24 yil boshqarib kelayotgan 71 yoshli Putin yana olti yilga oliy davlat lavozimiga qayta saylanish niyatida.
Aksiyalar
Fevral oyi o‘rtalarida Qutb doirasidan tashqaridagi koloniyada vafot etgan rossiyalik muxolifatchi Aleksey Navalniyning hamkorlari rossiyaliklarni 17 mart kuni soat 12:00 da saylov uchastkalariga borishga va shu tariqa siyosat hamda raqobatsiz saylovlarga qarshi norozilik bildirishga chaqirmoqda. Navalniyning o‘zi hayoti davomida kampaniyani qo‘llab-quvvatlagan. Mixail Xodorkovskiy, Mixail Lobanov, Maksim Reznik, Dmitriy Gudkov va boshqa rossiyalik muxolifatchilar ham bu harakatni qo‘llab-quvvatladi. Siyosatchining bevasi Yuliya Navalnaya G‘arbni Rossiya Federatsiyasidagi saylov natijalarini tan olmaslikka chaqirdi.
Moskva prokuraturasi 17 mart kuni tushdan keyingi mitinglarda ishtirok etmaslik to‘g‘risida ogohlantirdi. Asosiy saylov kuni tushdan keyin saylov uchastkalarida «muvofiqlashtirilmagan harakatlar»da ishtirok etish jinoiy qonunbuzarlik sifatida baholanadi, deyiladi departamentda.
