Bolalar ombudsmani Surayyo Rahmonova xabariga ko‘ra, 5 mart kuni Marg‘ilon shahridagi 29-umumiy o‘rta ta’lim maktabining 5-sinf o‘quvchisi hojatxonaga chiqib kelish uchun o‘qituvchidan ruxsat so‘ragan, ammo o‘qituvchi ruxsat bermagan. Shundan so‘ng, bola zarurat yuzasidan sinfdan chiqqan va birozdan keyin qaytib kelgan. O‘qituvchi esa uning ruxsatsiz harakatidan va gaplashib o‘tirishidan jahli chiqib, telefonini unga qarata otgan. Oqibatda bolaning boshi yorilgan. 

O‘quvchiga maktab hamshirasi tomonidan birinchi yordam ko‘rsatilib, boshi bog‘langan. Uyga shu holatda borgan vaqtida bolaning onasi uni shifoxonaga olib borgan. Unga zarur tibbiy yordam ko‘rsatilgani ta’kidlanmoqda. 

O‘qituvchining harakati yuzasidan tuman IIB tergovga qadar tekshiruv olib bormoqda. O‘quvchiga sudga oid tibbiy ekspertiza tayinlangan.