Davlat budjeti daromadlarining o‘sishi keskin sekinlashdi

Iqtisodiyot 19:19 / 19.01.2024 7964

2023 yilda O‘zbekiston Respublikasi Davlat budjetining daromadlari 231,7 trln so‘m bo‘lgan. Bu haqda Iqtisodiyot va moliya vazirligi ma’lum qildi. Xarajatlar borasidagi ma’lumotlar hali ochiqlanmadi.

Vazirlikning qayd etishicha, 2023 yilda davlat budjeti daromadlari 2022 yilga nisbatan 14,8 foizga oshgan.

Bu – budjet daromadlari o‘sishi sekinlashganini anglatadi. Daromadlar o‘sishi 2022 yilda 22,5 foiz, 2021 yilda 23,9 foiz, pandemiya boshlangan 2020 yilda esa 18,5 foiz bo‘lgandi.

2023 yilning birinchi va so‘nggi bank kunlari uchun Markaziy bank belgilagan rasmiy kurslarning o‘rtachasidan kelib chiqib hisoblansa, o‘tgan yilgi davlat budjeti daromadlari 19,6 mlrd dollarga teng bo‘lgan.

Daromadlarning 79,6 foizini soliqlar, 20,4 foizini esa soliqsiz tushumlar va boshqa daromadlar tashkil etgan.

O‘tgan yili soliq turlari orasida eng yuqori o‘sish bojxona bojida kuzatilgan – bu yo‘nalishdagi tushumlar 2022 yildagi 5,7 trln so‘mdan 2023 yilda 68,4 foizga oshib, 9,6 trln so‘mga yetgan.

Yer solig‘idan daromadlar 30,2 foizga (6,9 trln so‘mgacha), mol-mulk solig‘i tushumlari 27,5 foizga (5,1 trln so‘mgacha), jismoniy shaxslardan olinadigan daromad solig‘i tushumlari 23,0 foizga (29,9 trln so‘mgacha), aksiz solig‘i yig‘imlari 17,0 foizga (15,8 trln so‘mgacha) oshgan.

© Otabek Bakirov / Telegram

Soliq turlari orasida aylanmadan olinadigan soliq va foyda solig‘i bo‘yicha ko‘rsatkichlar pastligi bilan ajralib turadi. AOS tushumlari 4,0 foizga (2,4 trln so‘mgacha) pasaygan bo‘lsa, foyda solig‘idan daromadlar o‘sishi rasmiy inflsiya darajasidan pastroq bo‘lgan – 8,5 foiz (40,8 trln so‘mgacha).

Ko‘proq yangiliklar: