Checheniston rahbari Ramzan Qodirovning sog‘lig‘i haqida Kremlda ma’lumot yo‘q. Bu haqda 18 sentabr, dushanba kuni Rossiya prezidenti matbuot kotibi Dmitriy Peskov xabar qildi. «Bizda bu borada hech qanday ma’lumot yo‘q. Nima bo‘lganda ham, prezident ma’muriyati salomatlik haqidagi ma’lumotnomani bera olmaydi. Shuning uchun aytadigan gapimiz yo‘q», - dedi Peskov.

Qodirovning kasalligi haqida xabarlar 

O‘tgan haftada Telegram-kanallari va ommaviy axborot vositalarida Qodirovning sog‘lig‘i keskin yomonlashgani haqida xabarlar yana paydo bo‘la boshladi. Chechenistonning muxolifatdagi NIYSO Telegram-kanali Checheniston rahbari go‘yoki komaga tushib qolgani haqida xabar berdi. Bu haqda Ukrainaning «Obozrevatel» nashri chechen diasporasidagi manbaga tayanib yozdi. Biroz vaqt o‘tgach, Ukraina Mudofaa vazirligi («GUR») Bosh razvedka boshqarmasi vakili Andrey Yusov Qodirovning kasalligi og‘irlashganini, u «og‘ir ahvolda» ekanligini aytdi. 

17 sentabr kuni Qodirovning Telegram-kanalida u bog‘da sayr qilayotgani aks etgan video paydo bo‘ldi. «Internetda haqiqatni yolg‘ondan ajrata olmaydigan har bir kishiga toza havoda sayr qilishni va o‘z fikrlarini tartibga solishni qat’iy tavsiya qilaman. Yomg‘ir ajoyib tarzda tetiklantiradi», - deyiladi videoda. Shu bilan birga, video va Qodirovning so‘zlaridan bu oldindan suratga olingan tasvirmi yoki haqiqiy yozuvmi, aniqlab bo‘lmaydi. 

«Agenstvo» nashri ta’kidlashicha, 1 sentabrdan buyon Qodirov dolzarb voqealarga oid video va suratlarda ko‘rinmagan. 

Qodirovning ahvoli og‘ir ekani haqida xabarlar

Sayr videosi e’lon qilinganidan ko‘p o‘tmay chechen huquq himoyachisi va muxolifatchi Abubakar Yangulboyev Qodirov vafot etganini yozdi. U hech qanday dalil va ma’lumot manbasiga havola keltirmagan.

«Exo Moskvy» bosh muharriri Aleksey Venediktov Qodirovda og‘ir buyrak yetishmovchiligi kuzatilayotganini aytdi. «Shuning uchun tez-tez gemodializ qilish zarur. Bu, aftidan, Markaziy klinik shifoxonada amalga oshirilyapti (Moskvadagi prezident ma’muriyatining markaziy klinik shifoxonasi)», - deb yozadi Venediktov, ma’lumot manbasini ko‘rsatmasdan. 

OAV va huquq himoyachilari Qodirovning buyragi bilan bog‘liq muammolar haqida avval ham bir necha bor xabar bergan. Joriy yilning iyul oyida chechen muxolifatchi bloger Tumso Abdurahmonov Qodirov dializ olayotgani va «o‘lim to‘shagida» ekanini yozgan edi. 

«VChK-OGPU» anonim Telegram-kanali bir kun avval guvohlarga tayanib, Markaziy klinik kasalxonaga «yo chechen davlat raqamlari, yoki boshqa yuridik shaxslarning davlat raqamlari bo‘lgan, lekin salonida Checheniston fuqarolari o‘tirgan» avtomobillar «birin-ketin» kirib kelayotganini yozgan edi.