Таниқли қиличбоз, халқаро тоифадаги ҳакам Аида Ҳасанова 39 ёшида вафот этди. Ўзбекистон қиличбозлик федерацияси расмий сайтида унинг вафоти муносабати билан таъзия эълон қилинган.

Gazeta.uz нашри маълумотига кўра, у 23 май куни Тошкентдаги хусусий клиникалардан бирида косметологик жарроҳлик амалиётини бошидан ўтказган, шундан кейин аёлнинг аҳволи оғирлашган. У шифокор қарори билан бошқа шифохонага кўчирилган, бироқ кечқурун у жонлантириш бўлимида вафот этган.

Ўлим сабабларини аниқлаш учун суд-тиббий экспертиза тайинланган. Айни пайтда Чилонзор тумани прокуратураси томонидан терговга қадар текширув ўтказилмоқда.

• Маълумот учун, Аида Ҳасанова қиличбозлик фаолиятида кўп карра Ўзбекистон чемпиони, Марказий Осиё чемпиони, 2005 йилда Англияда ўтказилган турнир олтин медалига эга чиққан. 2014 йилда уч турдаги қуроллардан фойдаланган ҳолда қиличбозлик бўйича Ўзбекистон тарихидаги биринчи халқаро ҳакам бўлади. 2017 йилдан Ўзбекистон қиличбозлик федерациясига бош ҳакам этиб тайинланган. 2019 йилги Токиода Олимпиадасида Ўзбекистон ва Марказий Осиёдан биринчи ҳакам этиб сайланган, қолаверса ўша турнирда Осиё шарафини ҳимоя қилган ягона аёл қиличбоз ҳакам бўлганди.
• Эслатиб ўтамиз, шу йилнинг 5 март куни Mittivine юмористик лойиҳаси асосчиси, таниқли блогер Фарҳод Маннопов ринопластика операциясидан сўнг вафот этганди. Текширувдан сўнг 27 яшар вайнерни операция қилган жарроҳ, тиббий хизмат кўрсатган анестизиолог ва реаниматолог, лаборант шифокор ҳамда ультратовуш текширувлари шифокорида малакавий тоифа бўлмагани аниқланганди.