YeI qayta tiklanadigan manbalardan olinadigan energiya ulushini oshiradi

Jahon 15:21 / 30.03.2023 2464

2030 yilga borib Yevropa Ittifoqining umumiy energiya iste’molida qayta tiklanadigan manbalardan olinadigan energiya ulushi 42,5 foizgacha oshirilishi kerak, deyiladi YeI Kengashi bayonotida.

30 mart, payshanba kuni Yevroparlament va YeI Kengashi vakili bo‘lgan Yevropa Ittifoqiga a’zo davlatlar kelishuvga erishdilar, unga ko‘ra, 2030 yilgacha Yevropa Ittifoqida iste’mol qilinadigan umumiy energiyada qayta tiklanadigan manbalardan olinadigan energiya ulushi deyarli ikki baravar oshishi kerak - 42,5 foizgacha.

Taqqoslash uchun: 2021 yilda bu ko‘rsatkich Yevropa Ittifoqi bo‘yicha o‘rtacha 22 foizni tashkil qilgan. Shu paytgacha Yevropa Ittifoqining 2030 yilga mo‘ljallangan maqsadi qayta tiklanadigan manbalardan energiya ulushini 32 foizga oshirish edi.

«Qayta tiklanadigan energiya manbalaridan foydalanishda yetakchilik bo‘yicha birdamlikka erishildi. Kengash (Yevropa Ittifoqi) bizning ko‘plab ulkan maqsadlarimizni qo‘llab-quvvatladi. Demak, iqtisodiyotning qayta tiklanadigan energiya manbalariga o‘tishi muvaffaqiyatli bo‘lishi mumkin. Endi Yevropa Ittifoqiga a’zo davlatlar buni tezroq ma’qullashi aniq», deb yozdi Yevroparlament deputati Markus Piper Twitter’da.

Yevropa Ittifoqi iqtisodiyotida qayta tiklanadigan manbalardan foydalanish darajasi mamlakatlarga qarab farq qiladi. Bu borada Shvetsiya yetakchilik qilmoqda. U yerda bu ko‘rsatkich 63 foizni tashkil qiladi. Shu bilan birga, Lyuksemburg, Niderlandiya, Irlandiya va Maltada bu umumiy energiya iste’molining 13 foizidan past. Germaniyada qayta tiklanadigan manbalar tomonidan ishlab chiqarilgan energiyaning mamlakat umumiy energiya iste’molidagi ulushi 2022 yilda 46,9 foizni tashkil etdi. 

Yevropa Ittifoqining iqlim maqsadlari 2050 yilga borib «iqlim bo‘yicha neytral» iqtisodiyotni o‘rnatishni talab qiladi. Sanoat tomonidan chiqariladigan parnik gazlar tashlamalarining iqlimga salbiy ta’siri iqlimni muhofaza qilish choralari va zamonaviy texnologiyalar hisobiga to‘liq qoplanishi lozim. 

Ko‘proq yangiliklar: