Urush paytida narxlarning keskin ko‘tarilishidan katta daromad olgan yirik xalqaro energetika kompaniyalari bu mablag‘larning bir qismini Ukrainaning vayron bo‘lgan energetika infratuzilmasini tiklash uchun sarflashi kerak. Bu haqda Politico nashriga bergan intervyusida Ukraina Energetika vazirligi rahbari German Galushchenko ma’lum qildi. 

Uning so‘zlariga ko‘ra, G‘arb ham «cheksiz urush»ning oldini olish uchun Rossiya energetika mahsulotlarini sotish bo‘yicha sanksiyalarni chetlab o‘tishdagi bo‘shliqlarni yopishi kerak. 

Kiyev muqobil yadro yoqilg‘isi bilan ta’minlashi mumkin, bu bilan qator Yevropa Ittifoqi davlatlari Rossiya ta’minotiga qaramlikdan qutulishi mumkin, deya qo‘shimcha qildi Galushchenko.

28 mart, seshanba kuni Bryusselda bo‘lib o‘tgan Yevropa Ittifoqi energetika vazirlari kengashida Ukrainaga energiya uskunalari yetkazib berish va Rossiya atom sanoatiga qarshi yangi sanksiyalar muhokama qilindi. Bu haqda Ukraina Energetika vazirligi rahbari German Galushchenko xabar berdi. 

«Biz buning energiya ishlab chiqarish hali ham Rossiya yoqilg‘isiga bog‘liq bo‘lgan mamlakatlarga qanday ta’sir qilishini batafsil muhokama qildik, - dedi u. - Ammo bu masalani ko‘tarish va ular (ruslar) yadroviy xavfsizlik bilan amalga oshirgan ishidan keyin atom sanoatiga sanksiyalar qo‘yish muhim. Tsivilizatsiyalashgan dunyoga ruslarga Yevropa bozorida joy yo‘qligi haqida kuchli signal yuborish kerak».

Bryussel bu taklifni ko‘rib chiqishga va’da berdi. «Men Ukrainaning bugungi bosimini olqishlayman va Yevropa Ittifoqi davlatlaridan Rossiyadan gaz va neft, shuningdek, yadro yoqilg‘isiga qaramlikni kamaytirish bo‘yicha keyingi qadamlarni qo‘yishni so‘rayman. Bugun bu biz uchun muhim chaqiriq bo‘ldi, biz buni albatta qabul qilamiz», dedi Yevropa Ittifoqi kengashiga raislik qilayotgan Shvetsiya energetika vaziri Ebba Bush.