Shimoliy Koreya yetakchisi Kim Chen In yadroviy qurollar zaxirasini «geometrik progressiyada» oshirish maqsadida ishlab chiqarishni ko‘paytirishga buyruq berdi, deb xabar berdi Shimoliy Koreya Markaziy telegraf agentligi (KMTA) 28 mart, seshanba kuni. Bir kun avval, agentlik ma’lumotlariga ko‘ra, Kim Chen In yadro qurolini ishga tushirishga rahbarlik qilgan va KXDR Yadro qurollari institutining Shimoliy Koreya yadroviy qurolli kuchlarini sifat va miqdor jihatdan mustahkamlash borasidagi yutuqlar to‘g‘risidagi hisobotini tinglagan.

U yadro qurolidan istalgan vaqtda va istalgan joyda foydalanishga «ideal» tayyor bo‘lishga chaqirdi, shuningdek, «dushmanlarni qo‘rqitish» va KXDR hukumati, tizimi va xalqini himoya qilishi uchun «yadroviy kuchlarni doimiy ravishda kuchaytirish» zarurligini ta’kidladi.

Kim Chen Inning ta’kidlashicha, Pxenyan yadro quroli boshqa davlatlarga qarshi yo‘naltirilmagan, mamlakat yadroviy kuchlarining «dushmani» urushning o‘zi va umuman, yadroviy falokatdir, KXDR rasmiylari mintaqada tinchlik va barqarorlik o‘rnatilishiga intiladi. 

KXDR yaqinda yadroviy qurol tizimlarini sinovdan o‘tkazish bo‘yicha bir qancha mashg‘ulotlar o‘tkazdi. Xususan, 25—27 mart kunlari yadroviy kallakni olib yurishga qodir bo‘lgan yangi tipdagi suvosti droni, Pxenyanga ko‘ra, «yadroviy suvosti hujumkor qayig‘i»ning ikkinchi sinovi o‘tkazildi. 

27 mart kuni havoda yadro portlashi modelini ishlab chiqish uchun ikkita taktik «yer-yer» ballistik raketalari ham sinovdan o‘tkazildi.